Aizawlah NEZCC meeting buatsaih

North East Zone Cultural Centre (NEZCC) Annual Meeting of the Programme Committee chu nimin khan an chairman, Nagaland governor PB Acharya hoin an ṭhukhawm.

NEZCC Chairman chuan India ram hmun hrang hrangah North East state-te hi pho­chhah kan la ngai hle tih sawiin, "NEZCC kaltlang hian kan hnam ziarang phochhuahna leh in unauna ṭha kan neih a, kan hnam ziarang hrang hrangte in zirsak tawn a, in pawmsak tawn hi a pawimawh hle. Kan thu rel tur tam takte hlawhtlin nan hian college leh university hmanga inzirtirna ṭha a pawimawh a ni," a ti.

Thusawitu dang, Mizoram governor Lt. Gen. Nirbhay Sharma chuan North East state-te pawimawhna tarlangin, "Ramdangte nena ramri inṭawm km 4500 zet a awm. Tribal 213 vel chengin, ṭawng hrang 400 chuang a awm," a ti a, NEZCC hian a tum ber chu hnam ziarang hrang hrang humhalh te, inhlutsak tawnnate leh midang­te hma a phochhuah kawnga hmalakte a nih thu a sawi.

Meeting-ah hian Assam, Mizoram, Arunaachal Pradesh, Manipur, Tripura, Nagaland, Sikkim, Meghalaya palaite bakah sawm bik engemawzah an tel.