Nimin khan R Dengṭhuama Indoor Stadium, Mualpui chu chief minister Lal Thanhawla'n a hawng a, Mizoram State Sports Council (MSSC) kum 40-na, ruby jubilee lawm nghal a ni. CM hian Mizo ṭhalaite chu khawvel hneh turin chhung lam leh páwn lam nun uluk turin a chah.

Chief minister Lal Thanhawla chuan, Mizo ṭhalai infiammite zarah Mizoram chu khawvelah a ṭha zawngin pholan mek a ni tih sawiin, "Ṭhalaite khawvel thar kan din ang kan ti a, infiamna bikah hian a ngaihna hria Sports minister Zodintluanga leh a thawhpuite zarah nasa leh chak takin hma kan sawn a ni," a ti.

Mizoram chu infiamna lama tun ang zela a kal chuan Mizote'n khawvel an la hneh thei dawn tih sawiin Hawla chuan, "Chhûng lam leh páwn lam nun uluk a ngai. Hrisel a ngai a, discipline neih ṭhat a pawimawh," a ti.

Chief Minister chuan, Mizoram chu tun hnaiah infrastructure lamah nasa takin hma a sawn tih sawiin, "India hmarchhakah a nei ṭha ber pawl kan ni hi a lawmawm hle a, infrastructure kan neihte hi ṭhalaite khua leh tui ṭha an nih theih nan hman ṭangkai a ngai," a ti a; sorkarin ṭhalaite tan infrastructure ṭha a pek avangin ṭhalaite'n an vanneihzia hria se a duh thu a sawi.

Hetihlai hian Lal Thanhawla chuan infiamna hmunhma dim a ṭul thu a sawi a, Lammual chu thil engkima hman a nih vangin a tlo lo a, hei vang hian Rajiv Gandhi Stadium tlo taka a awm theihna turin humhalh a, a hman dan mumal zawka kalpui ṭha a tih tawh thu a sawi.

MSSC president leh Sports minister Zodintluanga chuan inlawmna thu sawiin, "Infra-structure nei lo chuan hma kan sâwn thei lo tih kan hria a, kum sarih chhungin hmasawnna tam tak kan hmu a ni," a ti. Infiamna chi hrang hranga ṭhalaite theihna hâi chhuak turin hmunhma
ṭha neih mek a nih thu sawiin, "Mahni tichhe thei laka inthiar fihlimin, kan hneh thei a ni tiin khawvel i hmachhawn ang u," a ti.

Zodintluanga chuan, Cong-ress sorkar hnuah football khel-mual 250 siamin an chei ṭha a; basketball court 15, volleyball court 11, tennis court pasarih, indoor stadium 12, training hall 19, football artificial turf pali, hockey artificial turf pahnih siam zawh tawh a nih thu a sawi.

R Dengṭhuama Indoor Stadium hi cheng nuai 749.95 sênga sak niin, contractor chu R Sangkhuma a ni a, a sakna sum chu USIS aṭangin nuai 600 leh SPA aṭangin nuai 150 hmuh a ni. June 8, 2012-ah hna ṭanin April 23, 2015-ah an sa zo.

MSSC hi kum April 20, 1976-ah din a ni a, president hmasa ber chu minister hlui H Thansanga a ni. MSSC ruby jubilee lawmnaah hian MSSC hnuaia awm sport association 32-in infiamna thuam famim nen parade an nei.