KHAWTHLIR

Thisen pe

Govt. Aizawl College chuan nimin khan Aizawl Civil Hospital tan thisen unit 80 an pe a, a petute mipa 44 leh hmeichhia 36 an ni.

Ran enkawl zat

Aizawla AH&Vety Hospital chuan, March 2016 chhung khan OPD-ah ran chi hrang hrang 5,180 an enkawl a, hri dan ran 80 pek niin, mobile clinic-ah ram 78 an enkawl. March thla chhung vek hian sorkar sum báwmah Rs. 10,180 an chhûng lut a ni.

Chetsualnaah thi

Thawhlehni zan dar 1 vel khan Mamit district-a Dapchhuah bulah tipper a chesual a, a hmunah tipper khalhtu Vanlal-hriatrenga (32), Ṭinghmun a thi. Driver dang Lalrinchhana, Sailam hliamin, Aizawl panpui a ni.

In kâng ral

Nimin chawhma dar 10 vel khan Lengpui Model Vengah Lalringi in, Assam type chu bungraw chuh hman lohin a kâng ral. Kângmei hi in chhunga electric hrui kâng aṭanga chhuak nia hriat a ni. Lengpui khawtlang chuan kângmei tuartute in saksak an tum.

Medical camp

Champhai SSA Mission chuan, nimin khan BRC training hall-ah Champhai RD block huam chhunga zirlai naupangte tan medical assessment camp an buatsaih a, primary leh middle school 75 aṭangin hrisel ṭha tawk lo zirlai 10 chuang leh zirtirtu pakhat inentir turin an ko a, an hriselna dinhmun an enfiah.

ZNP-in lawmpui

ZNP chuan thuchhuah siamin, Mizoram State Sports Council (MSSC)-in Ruby Jubilee a lawm thei chu lawmawm an tih thu an tarlang a; infiamnain hma a sawn zel theihna atana thawktu zawng zawngte theih-tawp chhuah zel turin duhsakna an hlân.

Health worker training buatsaih

Lawngtlai district-a health worker-te tan nimin khan Lawngtlaiah training buatsaih a ni a, District Health Society chairman A Muthamma, Lawngtlai DC-in a hmanpui.

Zir chiang tur ruat

Serchhip District Disaster Management Authority chu Thawh-lehni khan chief exe-cu-tive officer (CEO) VL Remliana hoin Serchhip addl.DC pisaah an ṭhu-khawm a, Disaster Management Plan thara telh tur leh paih turte sawihoin,lo zir chianga rua-hmanna siamtu tur an inruat nghal.

Darlawn-in district an phût

Darlawn District Demand Committee chuan thuchhuah siamin, Darlawn chu sorkar term kal mek chhunga district headquarters-a puang ngei turin Mizoram sorkar an phût tih an tarlang.DDDC chuan, hmar tlangdung hma-sawnna atan Darlawn-in district an demand chu chak tak a kalpui reng a nih thu an sawi a, "Darlawnah district headquarter a awm hma loh chu district thar dang a lo piang a nih pawhin, eng district tharah mah rîn luh kan duh lo," an ti.