MNF ṭhalaiin ration card an hâl

MNF ṭhalaite chuan nimin khan Vanapa Hall kawtah National Food Security Act (NFSA) hman a nih hnua ration card dik lo copy eng emaw zat an hâl a; Food, Civil Supplies & Consumer Affairs minister John Rotluangliana chu báng turin an phût.

MNF ṭhalaite chuan, FSA chu nawr luihna vanga kum hnih ral hnua phuailuai taka hmangah sorkar an puh a, "Mipuite'n buhfai tam tâwk kan lak phah tak avanga anmahni thil tih ṭhat ni âwm taka an aupui leh si hi mipuite bum tumna maiah kan ngai. Ration card siam chungchangah thil dik lo tam tak a awm avangin Supply minister John Rotluangliana hi a báng ngei turah kan ngai," an ti.

Ration card rintlak loh 2,40,000 vel siamna atan sorkarin cheng nuai 24 aia tlem lo a séng ral nia tarlangin MNYF chuan, "Ration card-te khul nana mipuite sum sen belhkhawm chu cheng nuai 48 tling ngei tura chhût a ni," an ti a; sorkar leh mipuite sum sen ral belhkhawm chu cheng nuai 72 a tlin thu an sawi.

MNYF president K Vanlalvena chuan, Supply Minister chu tuna ration card la dawng lote foreigner anga ngaih theih leh voter ID pawh nei lote ang hialin a chhuah niin a sawi a; John Rotluangliana'n eptute nawrna vanga a bân loh tur thu a sawi chungchangah, a bàn ngei theih nan an nawr zel dawn tih a sawi bawk.