CYMA-in sorkar leh HPC(D) inbiak an duh

Central YMA hruaitute chuan April 19, 2016 khan chief minister Lal Than-hawla a inah a kâwm a; Sinlung Hills Development Council (SHDC) area-a remna leh muanna tluantling a awm theih nan Mizoram sorkar leh HPC(D)-te chu inbe tura an duh thu an thlen.

YMA-a Tuisual Group, Tuivai Group leh Chalfilh Group-te'n SHDC area-a remna leh muanna tluantling a awm theih nan HPC(D) leh Mizoram sorkarin inbiakna dawhkan kîla inbiakna an neih theihna atana hmalakpui tura CYMA an ngenna, ziaka Chief Minister hnena an thlen tawh chu Thawhlehnia an inkawmnaah hian CYMA hruaitute chuan CM hnenah an thlen nawn leh a ni.

CYMA hruaitute chuan Chief Minister hnenah hian, Remna Ni (June 30) chu mipui náwlpuiin a huhoa lungrual taka an hman theihna atana an hmalak tum dante Chief Minister an hrilh.

CYMA hian vawiin chawhnu dar 1 hian mipui náwlpuiin Remna Ni an hman theih dan tura an hmalakna atan political party hrang hrang aiawhte CYMA committee room-ah an kâwm dawn a, a ṭul dan azirin kohhran hruaitute pawh kâwm an tum bawk.

CYMA-in CM hnena an thlente

. SHDC area-a remna leh muanna a awm theih nan Mizoram sorkar leh HPC(D) inbe turin an duh.

. Mizo mipui náwlpuiin Remna Ni an hman theihna atana an hmalak dan.

. Skill development lama hmasawn zel theih nana hmalak dan tur.

. Mizorama hman tur bik Drugs Control Act khauh zawka siam chungchang.