V/C bye-election-a venhimna tur sawiho

Mizoram State Election Commission-in May 19, 2016-a Aizawl leh Kolasib district khaw 31 V/C bye-election a buatsaih turah, nimin khan state election commissioner (SEC) L Tochhawng hoin a pisaah venhimna chungchang sawiho a ni.

L Tochhawng chuan, inthlan tur atan mawhphurtu hrang hrang inruat vek a ni tawh tih sawiin, "Boruak muanawm taka inthlan a nih theih nan venhimna lam dinhmun hriat chian a ṭul a, V/C inthlanna tluang taka neih a nih theihna atana kan ngaihdante sawiho a pawimawh a ni," a ti.

April 30, 2015-a Village Council General Election neih a nih khan engkim peihfel vek a, sum sen ngaite sên vek a nih hnuah remchan lohna vangin Aizawl district-a khaw 25 leh Kolasib district-a khaw parukah inthlanna neih a nih loh thu sawiin L Tochhawng, "Tunah sorkarin inthlanna neih theihna atan boruak a muanawm thu Commission an hriattir a, SEC chuan May 19, 2016-ah inthlanna nei turin inbuatsaihna an kalpui mek a ni," a ti.

SEC sawi danin, inthlanna felfai leh thianghlim neih a nih theih nan Model Conde of Conduct siam a ni a, chu chu inthlanna neihna hmun constituency-ahte chauh hman tur a ni a, district pumpui a huam lo.

Meeting-ah hian SEC hotute bakah, Aizawl DC Kannan Gopinathan, Aizawl SP Lalhuliana Fanai leh political party hrang hrang aiawhte an tel.

V/C bye-election-ah hian ballot paper hman tur a ni a, ballot paper-ah hian political party inang chu hmun khatah an awm ang a, reserved seat-te pawh hmun khatah dah a ni ang. V/C thlan tur chu Aizawl district-ah general seat 72 leh reserve seat 27 leh, Kolasib district-ah general seat 20 leh reserve seat paruk a ni.