Kohhranin HIV/AIDS a do dan tur sawiho Mizoramah HIV hrik pai mi 11,242 an awm
Nimin khan Aijal Club-ah HIV/AIDS dona kawnga kohhrante mawhphurhna leh tih tur zirho a ni a, kohhran pawl hrang hrang hnuaia pawl hruaitute an tel.
He huna tarlan danin February 2016 thleng khan Mizoramah HIV hrik pai mi 11,242 an awm tawh a, AIDS vangin mi 1,162 an thi tawh.
Project Sunrise buatsaih, 'State level consultation on role of churches in presentation of HIV transmission and drug abuse' hi Health secretary Lalrinliana Fanai-in a kaihruai a; FHI-360 country director Dr Bitra George chuan Mizorama kohhrante'n HIV dona leh ruihhlo ngaite enkawlna kawnga hma an lak dante a tarlan bakah, Bible zirtirna a nih dante a sawi.
MSACS project director Dr Lalmalsawmi Sailo chuan, HIV lama Mizoram dinhmun chu a chhe hle tih a sawi a, India rama state zingah Mizoram chu HIV hluarna ber dawttu a nih thu a sawi.
Dr Lalmalsawmi chuan, koh-hrante'n Mizorama HIV/AIDS dinhmun chu an pawm a, a dona kawngah nasa lehzuala hma an lak a ngaih thu a sawi a, "Kohhrante'n HIV darh zel tur ven kawngah hmalakna mumal kan neih loh chuan India rama HIV hluar lama pahnihna aṭangin kum nga a ral leh hunah chuan, natna ven zawh rual loh khawpa darh nasa dinhmunah kan ding thei a ni," a ti.
MSACS joint director (TI) Betty Lalthantluangi'n Project Sunrise chungchang a sawifiah a; National AIDS Control Organisation (NACO) leh Center for Disease Control (USA) ruahmannain kum 2015-a bul
ṭan a nih thu leh Mizoram bikah HIV hluarna Aizawl leh Champhai district-ah targetted intervention (TI) NGO 19-te hmanga hmalak
ṭan a nih tawh thu a sawi.
MSACS Project Director tarlan danin, kumin February thleng khan Mizorama thisen endik zat chu mi 3,43,687 an ni a, mahse, thisen endik nawnte an awm avangin mihring zat dik tak a ni lo. HIV hrik pai mi 11,242 hmuh chhuah an ni tawh a; kum 2015 tawp thleng khan AIDS vangin mi 1,162 an thi tawh.
MSACS website-a tarlanah, December 2015 thleng khan Mizoramah HIV hrik pai 11,001 an awm a, February 2016-ah mi 11,242 an awm avangin, thla hnih chhungin mi 241-in an pung hman tihna a ni.
Mizorama HIV+ve dinhmun
February 2016
Kai chhan Mipa Hmeichhia Total Percentage
Mipat hmeichhiatna 4,381 3,431 7,812 69.25%
Inchiu (IDU) 2,345 417 2,762 24.65%
Nu aṭangin 196 207 403 3.59%
Chhan hriat loh 154 111 265 2.51%
TOTAL 7,076 4,166 11,242 100%
December 2015-a dinhmun
Mipat hmeichhiatna 4,299 33,51 7,650 69.25%
Inchiu (IDU) 2,283 407 2,690 -
Nu aṭangin 195 203 398 3.59%
Chhan hriat loh 153 110 263 2.51%
TOTAL 6,930 4,071 11,001 100%