Unai Emery chuan Europa League-ah a team enkawl vawi li a champion-pui ta.

Europa League final chu Thawhlehni zan khan Gdansk-ah khelh a ni a, Villarreal chuan Manchester United barakhaihin nomawi an chawi. Hun pangngaiah 1-1 in an inhnehtawk a, penalty shootout-ah player zawng zawngin pet kim vekin 11-10 in Villarreal-in hnehna an chang.

Yellow Submarine hian Europe inelnaa final an luh hmasak berah hnehna an chang a, kum 98-a upa club-in nomawi lian tham an chawi hmasak ber a ni - Europa League 'awptu' Unai Emery an kawl vang a ni.

Striker ṭha bik
Champion tura rinkai Man United-in inkhel an thunun zawk a, goal erawh Villarreal-in an khung hmasa zawk.

Minute 29-na lekah Daniel Parejo freekick chu Spanish striker che ṭha tluang Gerard Moreno-a'n goal-ah a chantir a, Harry Maguire-a tel lohna Man United tlarhnung a pawp.

Europa League final-ah goal chance hmuh tur a tam lo a, ball chang tam zawk Man United goal bawh a na lo.

Yellow Submarine tlarhnunga Raul Albiol leh a hoten English club chhuanvawr Bruno Fernandes an dah ṭha a, Marcus Rashford leh Mason Greenwood-te an dang bet tlat.

Minute 55-naah Man United an vannei a, Rashford-a'n box pawn aṭanga a ball pet chu a per kual hnuah Cavani zawnah a tla fuh a, Uruguayan striker hian goal-ah a chantir.

Minute 90 chhungin goal dang hmuh tur a awm tawh lo a, extra time-ah pawh goal a lut tawh lo.

Inkhel hmuhnawm tia sawi tur a ni lo a, VAR erawh result tidanglam thei dinhmunah a ding. Hun pangngaiah Mason Greenwood-a'n penalty a beisei a, pek a ni lo. Extra time-ah ball-in Fred-a kut a per a, Villarreal-in penalty an hmu lo, Yellow Submarine an vanduai.

Penalty 'marathon'
Team pahnihin football hmuhnawm an pho chhuak thei lo a, penalty erawh a hmuhnawm tak zet.

Ṭhumvawra vannei Villarreal-in an pet hmasa a, an supporter awmna lamah penalty an pet bawk.

Inkhelh laia hna nei lo keeper pahnih - David de Gea leh Gerónimo Rulli kutah club pahnih a innghat a ni ber tawh.

Keeper pahnih hian outfield player-te penalty pet an dang thei lo. 10-10 a nih hnuah a tawpah keeper pet a ṭul ta - Rulli-a'n kawh zeta a pet goal hnuah De Gea a rawn pen chhuak ve leh a, a ball pet chu Argentine keeper hian a dang a, Villarreal an champion. Penalty-a an chakna zat chu 11-10 a ni a, khelmuala awm player-ten penalty an pet vek.

Thluak bur Emery
Villarreal leh Man United hi khaikhina ralah chuan an inthlau hle. Kum khata an sum lakluhah Man United (£509m) hi Villarreal (£86m) aiin a let nga velin a sang; player hlawh (£284m leh £73m), squad hlut zawng (£831m leh £142m) te pawh a inthlau vel vek.

Emery-a'n an dinhmun a hre chiang a, tum mumal tak a nei a, goal venhim chu hna hmasa ber a ni. Chumi thei tur chuan captain Raul Albiol a che ṭha takzet a, a bula ding Pau Torres-a'n Spain tana khel tlak a ni tih a pholang bawk.

Spanish manager hian chak tur chuan goal khung a ngai tih a hria a, 'set piece' ah an insawrbing tih a lang.

Yellow Submarine goal khungna pawh freekick a ni a, Moreno-a'n a class a pholang. Spanish striker Moreno hian Europa-ah goal sarih a khung a, a khung ang zat khung player pathum Pizzi, Yusuf Yazici leh Borja Mayoral awm mah se Villarreal striker hian assist vawi nga neiin midang zawng hian assist vawi hnih ṭheuh an nei thung.

Spanish club hian a tir aṭangin hun tawp dawna khelh dan tur ni awm takin an khel a, goal an venghim tawp. Counter attack hmanga chhut letna remchangah pawh Spanish club-in hman ṭangkai an tum lo a, 'risk' lak aiin goal venhim an ngai pawimawh.

Villarreal player-ten an hna an hre chiang a, player fing Daniel Parejo meuh pawh goal venhimna lamah kan hmu hnem zawk.

Unai Emery-a'n defensive game khawng ṭha tak hmangin semifinal-ah a club hlui Arsenal a hneh a, final-ah ManUnited lakah a hlawhtlinpui leh bawk.

United innghahna Bruno chu an an hnaih tlat a, a che hman lo. A sir aṭanga Marcus Rashford leh Mason Greenwood-te hlauhawm tur an hup bet vek bawk a; an tumah an chiang a, an tih tur tak an ti.

A ropui e
Villarreal champion dan ropuizia hi Mizote tan a fiah. A chhan chu mipui tluklehdingawn 1.2 chuang awmna India ram pumah mipui nuai 11.2 vel lek awmna Mizoram club Aizawl FC-in I League nomawi an chawi tawh vang a ni.

Villarreal hi Spain ram thingtlang khaw pakhat ve mai a ni a, he khuaa mipui awm zat mi sing nga vel lek niin Man United khelmual Old Trafford-ah an leng vek.

Final-ah pawh Villarreal ṭantuten nomawi an duhzia an lantir a, ticket 2,000 chauh an chang chungin Arena Gdansk an tieng (yellow) thei a. An champion chiah pawhin Villarreal ṭantu zingah lawm vanga mittui tla an ṭhahnem a - an tawn hi a ropui em a ni.

Ole Gunnar Solskjaer-a hnuaiah Man United-in nomawi la chawi lo
Mancheser United-in Ole Gunnar Solskjaer hnuaia final an khelh hmasak berah Villarreal an ngam lo a, Norwegian manager hnuaiah nomawi an la chawi lo. Solskjaer chuan, "Nomawi tel loa season hman hi season ṭha a ni lo. Hmasawn kan mamawh a ni," a ti - Europa League final-ah team ṭha zawka ngaih Man United an chak lo a, Solskjaer chu mawhphurtuah mi ṭhahnem takin an ngai a, an dem.

Norwegian manager hian chak tumin attacking player pahnih Marcus Rashford leh Mason Greenwood te a luh khawptir a, bench-ah Fred a dah. Goal an chhuah hmasaa goal thun ngei ngei an mamawh leh tak si avangin Solskjaer-a'n substitution a siam ngam lo, Marcus Rashford-a'n tihṭhat a nei meuh lo chungin a thlak lo - hei chauh hi ni loin minute 90 chhungin player pakhatmah a thlak lo!

Solskjaer hian kum 21 liam ta khan substitute aṭanga lutin Europe-ah Man United a champion pui a, tun ṭumah erawh substitution a siam fuh loh vangin Man United-in nomawi an chân thung - player-te an chauh hnep thlengin a chhawr a, an tuar. Tawnhriat nei ṭha zawk Unai Emery erawhin a khat mawi tawkin awmze neiin player a thlak. Hun tawp dawnah erawh Ole-a'n player panga a thlak a, penalty pet tura lut Mata leh Alex Telles ten goal khung mah se final-a khel tura thlan David de Gea-a'n a penalty hmachhawn vawi 11 a chhuah fai vek.

Spanish keeper De Gea hian April 23, 2016 hnuah penalty save a nei tawh lo a, final hmaa penalty a hmachhawn hnuhnung vawi 25 a chhuah vek. Europa final khel turin Ole-a duhsakna chang mah se De Gea hian a pu lawmna a siam thei lo a, penalty a pet goal lo - a chhuah mai a rinawm ta hle. Ole chuan, "Tu tan pawh a na vek. Hei chu football-in a ken tel a ni a, team chhanhimtu nih chang a awm a, chetsual chang a awm. David pawhin hun harsa hi a patlang thei ngei ang," tiin a sawi.

"Kan hlawhchhamna aṭangin kan inzir tur a ni a, kan duh anga ṭha kan la ni lo tih a lang. A ṭhenin Euro an khel ang a, a ṭhen an chawl ang. A pawimawh lai erawh a hma aia ṭhain hmasawn duhin an rawn let leh tur a ni," tiin season thar a thlir. A tawpah Sir Alex Ferguson a rawn lang a, lawmman semtu zingah telin champion tura a duh loh zawk Villarreal player-te champion medal a hlan. Sir Alex leh United ṭantute duhthusam a thleng lo.

Nomawi an chawi tak loh avangin Premier League-a pahnihna Man United tan season ṭha tih theih a ni lo a, penalty pet hmaa thlak Paul Pogba chelh a har dawn. Player langsar tan nomawi chawi thiam lo (?) Solskjaer enkawl Manchester United zawm tura thutlukna siam turin inngaihtuah ṭhat a ṭul bawk ang.

Champions League khelh ka duh - Unai Emery, Villarreal coach
Europa League bikah chuan Unai Emery aia manager ropui an awm ta lo. Villarreal manager hian Europa League final vawi nga a lut tawh a, vawi li a champion. Spanish manager hi Europa League-a record nei ṭha ber coach a ni a, a sawi uar deuh phei chuan inelna hi 'Unai Emery League' an ti hial.

Villarreal hi La Liga-ah pasarihna an ni a, Manchester United hi hneh lo se season thara inelna thar Europa Conference League khel tur an a ni. Amaherawhchu Yellow Submarine hian hnehna an chang a, Europe inelna sang ber an khel dawn. Kum 49 mi Unai Emery chuan, "Villarreal hian tun hmain Champions League an khel tawh a, nuam an ti dawn. Europa League champion chu ka duh a, mah se Champions League-a khelh ka duh zawk. Kan hun duhawm tak hi min ṭantute nen kan lawm ang a, naktukah kan chhungte nen kan lawm ve leh ang," tiin inkhelh banah a sawi.

Emery hian he inelnaah hian Sevilla chu vawi thum (2014, 2015, 2016) a champion pui tawh a; Arsenal pawh final thlenpui mah se Chelsea lakah an vanduai.
Spanish manager hnaih bertu chu Inter Milan leh Juventus (1977, 1991, 1993) champion pui tawhtu Italian manager Giovanni Trapattoni a ni. Vawi hnih champion tawh manager panga an awm - chungte chu Luis Molowny (Real Madrid), Juande Ramos (Sevilla), Rafael Benítez (Valencia, Chelsea), José Mourinho (Porto, Man United)leh Diego Simeone (Atlético ) te an ni.

Inkhel chungchang sawiin Emery chuan, "Ka hlim hle. Player-te hi season tluanin an thawkrim a, final-ah pawh chak an phu. Manchester United hi team ṭha tak an ni a, elpha turin kan khel ṭha a ni," tiin a sawi. A champion tawha nuam a tih ber a nih thu sawiin Emery chuan, "Nomawi ka fawh khan fan, club, player, coach, club tana hnathawk, journalist te aiawhin ka fawp. A bik takin Don Fernando Roig (club neitu) leh Villarreal khua tan a ni. In chhungkuaa min telh ve hi ka lawm a, tun ang renga nomawi chawi nuam tih hi ka nei lo," a ti.