Wilshere an chhuah zalen

Jack Wilshere chuan tun season tawp rualin Bournemouth tana a con­tract a hmang zo dawn a, nipui bazar hunah a club duhzawng zawm thei tura chhuah zalen a ni - contract hi an pawtsei dawn lo.

Kum 29 mi Wilshere hian January thla khan Cherries hi a zawm, inlena hrang hrangah match 17 khelin goal hnih a khungsak. Wilshere chhuak mah se Junior Stanislas leh Adam Smith te erawh hun rei zawk atan chelh an tum.

English midfielder Wilshere chuan, "Bourne­mouth chhungkaw chungah lawmthu ka sawi, tun hnai thla nga liamta chhung khan hun nuam tak tak kan hmang ho a ni. Kan tum ram thleng chiah lo mah ila hmasawnna tam tak kan nei," tiin a sawi.

Season hmasa Premier League aṭangin Bournemouth hi an tla a, Championship aṭangin EPL-ah kir leh nghal tum mah se kuminah an tum a hlawhtling lo. Playoff semifinal-ah Brentford an ngam lo a ni.