Media hmachhawn lo tur Osaka

Naomi Osaka chuan French Open an khelh hunah chanchinthar thehdarhtute a hmachhawn loh tur thu a sawi a, hetianga tih chhan chu rilru lama nghawng a neih ṭhin vang niin a sawi bawk.

Japanese star hian Grand Slam nomawi pali a chawi tawh a, a hlawhtlinna hi hard court-ah ve ve a ni. French Open leh Wimbledon-ah erawh a thlen san ber chu third round ve ve chauh a ni, atan clay leh grass court hi hmun ṭha a ni mawlh lo.

Pathianni aṭangin Roland Garros an khel ṭan leh tawh dawn, world number 2 hian a chunga zawhna tam tak thleng leh thei chu intih buai tir loh hram a duh niin a lang a, a ṭhat pui dawn nge dawn lo chu hunin a hril ang.

Kum 23 mi Osaka chuan, "Roland Garros kan khelh hunah chuan press conference ka nei lo ang. Mite hian kan rilru leh taksa dinhmun ngaihtuah lem lo hian thil hrang hrang min zawt ṭhin. Kan ṭhat lohna lai tam tak, tun hma pawha zawhna kan dawn tawhte hi min zawt nawn fo.

"Ṭhat tawk lohna lai inhrilh nawn fo hian min siamṭha ber lo a, rilru lamah nghawng a nei ṭhin zawk. Infiammi tam takin media vanga harsatna an tawh ka lo hmu tawh ṭhin. Press ka hmachhawn loh vanga pawisa ka chawi a nih chuan rilru lam hriselna kawnga thawhlawm a ni mai," a ti.

Osaka hian theihna a nei sang a, player ṭha bik Serena Williams pawh hneh thei a ni. Paris khawpuia inelna hi clay court-a khelh a nih avangin a rilruin a zuam lo deuh niin a lang a, chutih rualin season dang aia chetṭhat erawh a tum tih a chiang.