Conte leh Inter Milan an inṭhen

Antonio Conte chuan Serie A nomawi a chawi pui aṭanga ni tam a liam hmain Inter Milan a chhuahsan.

Italian champion leh Conte hi inhriatthiam tawnnain an inṭhen a, season thara a kalna tur chu zawhna lian tak a ni.

Conte-a contract neih lai hi season thar lo awm tur daih hi a la ni, kum khatah euro maktaduai 13 a hlawh - a hna a kalsan avang hian club lamin zângnadawm nan euro maktaduai sarih an pe ang.

Inter Milan chuan thu chhuah siamin, "FC Internazionale Milano chuan Antonio Conte nen inhriatthiam tawnna in contract kan neih lai chu kan ti tawp. Club chuan a hnathawhte avangin Antonio chungah lawmthu a sawi.

"A vawi 19 nana Serie A nomawi min chawipui thei hi ropui kan ti hle. Antonio Conte hi kumkhuain kan chhungkaw zinga mi a ni tawh ang," tiin Conte an thlahna thu an ziak a, manager thar tur hming sawi rik a la awm lo.

Thawnthu chu...
Inter Milan hian 2019 khan Conte an lalut a, an chunga leng Juventus el phak an duh avangin manager ṭha a lalut. Conte an neih hma season hnuhnunga Inter-in Old Lady an phak lohna chu point 21 zet a ni.

Conte an neih hnuah erawh thawnthu a danglam. Season hmasa khan Nerazzurri hian champion Juve an phak loha chu point khat chauh a ni a, Europa League final an lut bawk. An tum ram thleng zo lo mah se nasa takin hma an sawn tih a chiang hle.

Italian manager hian a player hman thiam a hui khawm a, an zingah - Romelu Lukaku, Christian Eriksen leh Alexis Sanchez te pawh an tel, tun season an hman zawh meuh chuan Serie A title an la a, 2006-07 season a point 97 an hmuh hnuah an hmuh hnem ber (91) an tawng.

Sum awm lo
Manager mahni thuduh ve tak Conte hian tun hmain club neitu lam aṭanga thlawpna a dawn ṭhat tawk loh thu a lo sawi tawh, tun ṭuma an inṭhen chhan pawh hi thuneitu lam nen an ngaihdan a inmil loh vang a ni.

Italian manager hian nipui bazarah player ṭha lakluh a duh, Serie A chauh ni loin European football thlenga hlawhtlin a duh tihna a ni. Mahse, club neitu lamin sum hman chu sawi loh, an neihsa aṭangin euro maktaduai 80 man vel hralh an tum.

Conte-a'n player lak nan sum a mamawh a, club neitu lamin sum tuak nan player hralh an duh thung. Ngaihdan inang lo leh inpersan lutuk an nih avangin thawhdun theih a ni lo, an inṭhen avang hian Conte-a'n hna thawk lo mah se season khata a hlawh tur zatve vel chu a dawng ta tho.

Serie A leh zawhna?
Inter Milan hian Conte thlak nan tunge an lakluh ang tih zawh chu zawhna lian tak a ni a, champion lai hian an player ṭah ṭhenkhat an hralh hmel avangin manager thar tan hna a hautak dawn hle - hming lamrik zingah Lazio coach Simone Inzaghi chu a langsar zinga mi a ni mek.

Mi tam takin AS Roma coach thar Jose Mourinho leh Conte te 'in ngur' boruak an hriat chak tak chu a awm dawn rih lo niin a lang. Manager pahnih hian tun hmain Premier League lamah thawhthu ngaihnawm an lo nei tawh ṭhin.

Khawthlang media ṭhenkhat tarlan dan chuan, Inter neitu Chinese sumdawng hausa hian loan rulh tur an ngah a, player hralh bakah an hlawh tih hniam thlengin a thleng thei niin an sawi, hetiang taka sum lama an buai a nih chuan thawh chhuah a harsa mai thei.

"Kan inbiak hmasak ber chu 2014 kha a ni a, a hnu leh tun thlengin nghet takin kan inzawm. Hun tam tak kan hmang dun a, kan inhriat aṭanga kan thawhdun ṭan hun a inhlat chhan erawh chung lama mi chauhin a hria. Ka nunah hian a hunah takah i rawn lang a, a ṭobul aṭangin player ṭha zawkah min chher chhuak. Taksa mai bakah rilru lam thlengin min ti paukhauh a, a tawpah hnehna chu kan chang dun a ni. Nang chu hnehna changtu ropui i ni a, ka hringnuna coach i rawn ni thei hi ka lawm. Taksa lam inbuatsaihna, rilru put hmang leh hnehna chan duhna thinlung ka nuna min tuhsak te hi a tawp thlengin ka theihnghilh tawh lo ang - i lakah bat ka ngah," - Romelu Lukaku