VVD tel lohna Netherlands squad an puang

Netherlands coach Frank de Boer chuan Euro 2020 khel tur final squad-a puang ta a, Liverpool defender Virgil van Dijk tel lohna squad-ah Steven Bergwijn chu player koh loh langsar a ni.

Tottenham Hotspur winger Bergwijn hi provisional squad-ah chuan telh a ni a, mahse, De Boer-a'n final squad-a tel tlakah erawh a ngai lo - player pariat chhawk zingah a tel.

Bergwijn bakah hian Aston Villa winger Anwar El Ghazi, Krasnodar midfielder Tonny Vilhena, Fulham right back Kenny Tete, Mainz 05 centre back Jeremiah St. Juste, AS Roma right back Rick Karsdorp, Atalanta right back Hans Hateboer leh AZ Alkmaar keeper Marco Bizot-te chu final squad-ah an tel phak lo.

Euro 2020 khelh turah Netherlands hi Ukraine, Austria leh North Macedonia-te nen group C-ah an awm ho a, last 16 lut turin beiseina an nei sang ang.

VVD tel lohna
Liverpool defender Virgil van Dijk-a'n hliam vangin season tluan deuhthaw Merseyside club tan a khel thei lo a, Premier League defender langsar hian dam lam a pan mek thung.

Mahse, Netherlands captain hian Euro khel tur chuan a tan a la hma mah mahah a ngai a, Netherlands-in squad an puan hmain ram tana a fehchhuah theih loh tur thu a puang.

VVD chuan, "Euro-a kan ram team ka kaihruai thei lo tur hi hrehawm ka ti a, mahse, thil awm dan thlirin thutlukna dik tak ka siamah ka inngai a ni," a ti a, Euro khel turin a la inpeih lo.

Kum 29 mi centre back tel lo pawhin Netherlands hi mangang lutuk tur erawh an ni lo. Tlarhnung laia khel turin Juventus centre back Matthijs de Ligt, Manchester City defender Nathan Ake leh Inter Milan centre back Stefan de Vrij-te ho an awm a, ṭum danga an ṭhat tawk lohna tlarhnungah ngaihtuahawm an ni lo.

Hmun chang lo Bergwijn
Kum 23 mi Bergwijn-a'n Netherlands squad-ah hmun a chang lo a, heti zat lek kum ni chunga ram tana vawi 11 lo inlan tawh winger tan chuan major tournament-a hruai tel loh nih hi a na ang.

Bergwijn hian January 2020 khan Dutch club ṭha PSV Eindhoven tan pound maktaduai 26.7-in Tottenham Hotspur-a zawm a, a boruak a lian hle - a season hmasa berah hian league match 14 khela goal thum khungin assist vawi khat a nei.

Tun season-ah Spurs tan inelna hrang hrangah match 35 khelin goal khat chiah a khung a, assist vawi sarih a nei thung - league match 21 a khelh aṭangin vawi 13 chu bul a ṭan.

Mahse, Dutch winger hian season chawhnu lamah club tan hmun a chang tam tawk lo a, De Boer-a'n tun hnaia club tana inlan tam lo player hi an ram squad-a awm turin a ṭha tawk loah a ngai.

El Ghazi hi
De Boer-a thutlukna sawisel duh tan sawisel theih tak a awm nual - Villa winger El Ghazi koh a ni lo hi thil mak a tling a, ram tana vawi hnih lo inlan tawh winger-in season a hman dan thlir chuan koh a phu.

Dutch club ṭha Ajax aṭanga a hming chhertu winger hian tun season-ah Villa tan inelna hrang hrangah match 31-a khel a, goal 11 ngawt a khung. Netherlands squad-a awm nan erawh a tling tawk lo.

Hetihlai hian PSV winger Cody Gakpo leh Spartak Moscow winger Quincy Promes-te chu koh an ni lawi a, Gakpo hian inelna hrang hranga match 29-a khelhah goal 11 khungin assist vawi thum a nei.

Promes hian match 36-ah goal kua khungin assist vawi li a nei a, player pahnih khelhna erawh Dutch league leh Russian Premier League a ni a, Premier League-te nen khaikhin chi a ni lo.

Hriat loh val
Kum 51 mi De Boer-a'n thutlukna huaisen thlak tak siamin ram tana la inlan ngai lo player pahnih a ko a, Gakpo leh kum 19 mi Jurrien Timber-te an ni.

Gakpo hi kum 22 mi a ni a, PSV tih loh club dang tan a la khel ngai lo. PSV B team tana hun a hman laiin 2017-18 season khan Eredivisie-ah match khat a khel ve a, 2018-19 season khan match 16-a khel zui.

PSV tan a career-ah match 88 khelin goal 21-a khung a, assist vawi 18-a nei - ram tana khelh a phu leh phu loh chu a hriat thuai dawn. Ajax centre back Timber-a'n season liam taah khan inelna hrang hrangah match 27-a khel a, a kum a la tlem deuh avangin Euro-ah bul ṭan tura beisei chi a ni lo.

Insawifiahna
World Cup 2010-a Netherlands-in final an luh ṭuma assistant coach De Boer-a'n thutlukna mak siam a nei nual a, chung zingah chuan kum 2016 hnua ram tana inlan tawh lo, kum 38 mi keeper Maarten Stekelenburg-a kohte chu a tel.

Ram tana vawi 58 inlan tawh keeper hi season hman zawh tak ṭan dawn khan amah chher hriamtu Ajax-ah a kir a, inelna hrang hrangah match 18 bak a inlan lo. Mahse, AZ first choice keeper Bizot aiin koh a ni.

De Boer chuan, "Koh loh nih chu thil hrehawm tak a ni a, a dam thei ang bera hrilh duhin player-te pawh ka be vek. Hrehawm an tih avangin ring taka au te pawh an duh mai thei a, chuvangin ka be rei hlawm lo," a ti!

Ajax coach hlui chuan, "Trainer leh coach ka nihna ang chuan thutlukna siam kha thil harsa a ni lo a, mahse, mihring ve tho ka nihna aṭang chuan nuam ka ti bik lo," a ti a, squad-ah player zawng zawng telh vek theih an nih loh thu a sawi.