European club-te hlutna a tlahniam nasa
Business services group lar KPMG chuan European football club-te zirchianna a nei a, an zirchianna aṭanga a lan danin club-te hlutna a tlahniam nasa hle.
KPMG hian Europe-a top club 32-te hlutna chu February 2020 hnuah khan euro tluklehdingawn 6.1-a a tlakhniam thu an sawi a, heti taka an hlutna a tlakhniam chhan hi Covid-19 hri leng vang a nih thu an sawi bawk.
European club-te hlutna nasa taka tlahniam karah Real Madrid chuan club hlu ber dinhmun an la luah chhunzawm zel a, Barcelona, Manchester United, Bayern Munich leh Liverpool-ten dawtin top five-ah an lang ve bawk.
A tehna chu
KPMG hian mawlmang takin European club-te hlutna hi a teh satliah lo a, hlawkna an siam dan, broadcasting rights, an lar dan, inelnaa an thlen chin leh stadium hlut zawngte chhut a ni.
Tun hnaiah khelmual chhung hlawhtlinnain Real Madrid um lo mah se a zawna a kum thum nan a chung berah an la awm tho a, season hmasaa 10-na Paris Saint-Germain chu pariatnaah an invawrh chho.
Club 32 tarlan zingah Atalanta, Olympique de Marseille leh Fenerbahce chu a vawi khat nan an lang a, nikuma lang zingah West Ham, Athletic Bilbao leh Besiktas chu kuminah an lang phak lo thung.
Premier League
Khawvela league ngaihven hlawh ber a nih miau avangin European club hlu zingah Premier League-in club an thawh hnem leh viau a, United leh Reds bakah Manchester City (6-na), Chelsea (7), Tottenham Hotspur (9), Arsenal (11), Everton (18) leh Leicester City (20) an lang.
Chutihrual chuan lawm viauna tur erawh a awm chuang lo - Europe club hlu zingah English club pariat hi lang mah se an hlutna erawh nasa takin a tlahniam ve tho a, nikuma pahnihna United phei chu kuminah pathumna an ni a, an hlutna hi 20% in a tlahniam hman.
United hi nikuma pathumna Barcelona chuan tlanpelin pahnihna dinhmun an luah a, Spurs hi nikumah khan pariatna an ni a, kuminah erawh pakuanaah an tla thung.
Hlutna tlahniam
Real-in European club hlu ber dinhmun an luah avangin an hlutna a tlahniam ve lo tihna a ni lo a, nikum aia an hlutna tlakhniamna hi 16% a tling hial - top 10-a hlutna tlahniam nasa ber chu United (20%) an ni.
Liverpool-in nikum ang thoin pangana dinhmun luah mah se 14% in an hlutna a tlahniam a, parukna City pawh 17% ngawtin an hlutna a tlahniam a, Spurs nen an hlutna tlakhniamna zat hi a inang.
PSG chu 8% in an hlutna a tlahniam a, top 10-a lang zinga an hlutna tlahniam tlem ber an ni a, Bayern Munich (9%) pawh club dang ngaihtuah chuan an hlutna tlakhniamna a sang lo hle.
Tlakhniamna chu
European club-te hlutna tlahniam hi kum nga chhunga a vawi khatna a ni a, heti taka an hlutna a tlakhniamna chhan pakhat hi broadcasting lama sum an hloh nasat vang a ni a, stadium-a fan-ten inkhel an en theih loh vang a ni bawk.
European football-a club hlu 32 zinga lang phakte hlutna belhkhawm hi euro maktaduai 33.6 a tling a, he hlutnaa 39% chu Premier League club-te hlutna a la ni cheu.
KPMG zirchiannaah hian Premier League tih loha club thawhhnem league chu Serie A an ni a, AC Milan, Atalanta, Juventus, Lazio, Napoli, Roma leh Inter Milan an thawh a ni.