Mangṭha Zidane - a vawi hnih nan!

Real Madrid manager Zinedine Zidane chuan a vawi hnih nan Madrid khaw club a chhuahsan leh ta a, Real chuan an coach thutlukna an zahsak thu an sawi.

Spanish club chuan thuchhuah siamin, "Tun hi Zidane-a thutlukna zahsak hun a ni," an ti a, an coach chu a professional-na, inpekna leh Real tana a hlutna avanga lawmthu an hrilh thu an tarlang.

Player-a nih laia Real tana ropui taka lo khel tawh Zidane hian January 2016 - May 2018 inkar khan Real-a lo enkawl tawh a, hetih chhung hian Champions League nomawi vawi thum chawiin La Liga (1), Spanish Super Cup (1) UEFA Super Cup (2) leh FIFA Club World Cup (2) ah a championpui hman.

Heti taka a hlawhtling chung hian Real president Florentino Perez nen an inhmuthiam lo nia sawi a ni a, a bang. Mahse, thla 10 hnuah Real mangangin an ko kir leh a, season hmasa khan league nomawi a chawipui lehnghal.

A bul ṭanna
Zidane-a'n beiseina sang tak nen season bul a ṭan a, mahse, beisei ang erawhin season an hmang lo - Copa del Rey round of 32 aṭangin third division club Alcoyano chuan an pet chhuak a, Spanish Super Cup semifinal-ah Athletic Bilbao an ngam lo bawk.

La Liga-ah beisei an phak lo a, Champions League semifinal aṭangin Chelsea-in an pet chhuak bawk - hetiang boruak karah hian Spanish media-ten Zidane an um zui ve reng a, French coach hian media hmaah amah leh a player-te chuan tun aia zah an phu zawk thu thlengin a sawi.

Zidane-a'n media hmaah ṭawngkam a duhtui lo sawt a, chhuah a tum hnaiah tam takin an ngai zui - La Liga season a zawh hma khan a player-te hnenah season tawp ruala a chhuah tur thu a sawi tih thlengin media lam chuan an ziak.

Mahse, Zidane chuan he puhna hi a pha a, a tan La Liga a pawimawh hmasak ber thu a sawi - mahse, Zidane-a'n season tawpah a team nomawi a chawipui ta lo a, a chhuah thu puan a ni ta.

Mangṭha Zidane
Real chuan, "Zidane hi Real tana mi ropui ber zinga mi a ni a, coach leh player a nihna anga club tana a hnathawh hi a ropui hle. Real fan-te thinlungah a awm reng dawn tih a inhria a, he hmun hi a tan chuan a in a ni reng dawn a ni," an ti.

Kum 48 mi Zidane hian a contract ang chuan Real-ah hian kum khat dang cham turin contract a la nei a, tunah chuan khawi club lamah nge a kal ang, tih chu inrinsiak a ni leh ta zawk.

Zidane hian a vawi hnih nana Real-a enkawl hian La Liga leh Spanish Super Cup nomawi a chawipui leh a, Real tan match 23 dana nomawi chawi zel ang a ni - hetiang record nei thei Real coach dang zingah an awm lo.

Real tan nomawi 11 a chawi a, ani aia Real tana champion hnem coach chu Miguel Munoz (14) chiah a awm - Spanish manager ropui Munoz ai hian match 342-in Real hi a kaihruai tlem zawk thung.

Tu nge Zidane thlak dawn?
Zidane ban tur thu a than aṭang tawh khan French manager thlak tur hi khawthlang media-ten an inrinsiak a, Massimiliano Allegri, Antonio Conte leh Raul Gonzalez-te hming a ri ring hle.

Real legend Raul hian coaching lamah chuan tawnhriat a nei tam lo hle. Real Madrid Under-19 chu 2019-20 season khan UEFA Youth League-ah a champion pui a, club chhungkua a hriatchianna chu club lama thuneituten an duh chhan niin a lang.

Hetihrual hian Allegri hian Real nen an inbiak avangin Juventus sawmna pawh a hnar nia sawi a ni a, Italian coach hi AC Milan leh Juve tana a lo hlawhtlin tawhna en chuan Zidane thlak awm tak chu a ni.

Inter Milan coach aṭangin Conte a bang a, Chelsea boss hlui hi mahni thu duh ve tak a ni a, Real pan ta se, club President a thu em emna hmunah hian rei a daih kher lo mai thei.