Son Heung-min leh Dele Alli te goal hmangin Tottenham chuan Arsenal 2-0 in an hneh a, an hmelma hi Carabao Cup quarterfinal aṭangin an pet chhuak, semifinal-ah team lian Chelsea nen an inhmachhawn leh ang.
Nilaini zan inkhel pakhat zawkah Chelsea pawhin hun tawp dawn lama Eden Hazard goal hmangin Bournemouth 1-0 in an hneh hram. League Cup semifinal lehlamah hian Manchester City leh League One club Burton te an inkhel thung dawn; semifinal chin chu home leh away-ah khelh tur a ni tawh dawn a, nakkum January 7 leh 21-ah khelh tur a ni ang.
Gunners an tlawm
Emirates Stadium-ah South Korean international Son-a'n minute 20-na lekah chiang zetin a hlap lut a, second half-ah England international Alli chuan hla deuh tak aṭangin tawih takin a chip lut zauh bawk - November 2010 hnua a vawi khat nan Arsenal mualah hnehna an chang.
League Cup ni mah sela club pahnihin chak an tum a, an player neih ṭhat an chhawpchhuak. Spurs striker Harry Kane chu bench-ah dah ni mah se a inlan tho, Arsenal pawhin squad-ah Mesut Ozil an telh lo tih mai loh chu an neih tawka ṭha an hmang ve bawk.
Henrikh Mkhitaryan-a'n Tottenham keeper Paulo Gazzaniga chauh a hmachhawn tawhah hnai tak aṭangin a hlah a, Aaron Ramsey-a pet goal tura ngaih pawh goal ban a nam per. Alexandre Lacazette-a'n pan a tih per bakah Pierre-Emerick Aubameyang pawhin cross bar a pet per bawk - Gunners an vanduai. Petr Cech-a'n Christian Eriksen goal khung tur a dan sak pawh Spurs lamin an ui khawp ang.
Ozil a awm lo
League Cup a nih vangin Mesut Ozil a alawltir a ni thei a, chutih rualin Premier League lama a chhawr ṭhin player ṭha dangin Spurs an hmachhawn tho avangin Germany international hlui hian Unai Emery ruahmanna-ah hmun a chang sang ta lo anga sawi thawm a ngawm nghal.
Arsenal manager Emery chuan, "Player 25 vel kan nei a, vawi khata inkhelh vek theih a ni lo. Tum ṭum atan chuan tactical thil vangin Mesut hi kan telh lo," a ti. Hun lo kal zel tura Ozil awm dan tur erawh a sawi thei lo thung.
Spanish manager chuan, "Tunah chuan Inrinni zana Burnley match kan neih tur chauh kan ngaihtuah, thlasik bazar huna thil thleng tur pawh sawi lawk theih a ni lo. Training kan nei chhunzawm nghal dawn a, chumi aṭang chuan kar tawpa inkhel tur chu kan thlang leh ang," tiin a sawi.
Alli an vawm!
North London Derby a nih tawh chuan a boruak a sang ziah a, December thla tir maia an chak lohna hmunah Tottenham-in hnehna an chan let avangin an lawm. Goal mawi khungtu Alli chu mual sir lama a awm laiin tui bottle ruaka vawm a ni.
Spurs manager Mauricio Pochettino chuan, "Ram ṭhenkhat chu ni se la hun eng emaw ti chhung stadium an khar phah hial ang. Mahse, buaina lian zawk thleng loa kan awm thei kha a lawmawm," a ti.
December 2 zana an intawn ṭumin Arsenal striker Pierre-Emerick Aubame-yang hmaah Spurs ṭantute lamin balhla kawr an lo theh thla tawh bawk. Gunners manager Emery chuan Alli chunga thil thleng hi a hmuh fuh ve loh thu a sawi thung.
