Mourinho-a'n ngawih a chuh
Jose Mourinho chuan Manchester United a chhuahsan dan chungchang chu a thawhpuite chunga zahna lantir a duh avangin sawi zui a duh lo. Thawhlehni khan Portuguese manager hi Old Trafford-a kum hnih leh a chanve a awm hnuah ban a ni.
Man United hi Premier League-ah paruknaah an awm mek a, hmahruaitu leh an hmelma ni bawk Liverpool aiin point 19 in an hmu tlem zawk.
Pa ṭawngtam a ngawi
Jose Mourinho hi football khawvelah chuan manager ropui zinga mi a ni a, media hmaah thu ngaihnawm tak tak a chhak chhuak fo a, a manager pui leh a player te pawh sawisel fo mah se an ban hnuah erawh ngawih a chuh thung.
Kum 55 mi Mourinho chuan, "Manchester United a bul ka ṭantirh aṭang khan he team enkawl thei zinga ka tel ve hi ka inchhuang tak meuh meuh a, United fan zawng zawngin hei hi an hriat ngei pawh ka ring nghet tlat," tiin United a dah san thu a tarlang.
Mourinho hi a chenna London-ah a let leh tawh a, Portuguese manager chuan, "United nena kan thawnthu chu a tawp ta a, club tana ka thawhpuitute zahna avangin sawi zui ka tum lo. Manager tam tak chuan an club chhuahsan chhan chungchang leh club chungchangah sawi zui tur an ngah ṭhin. Kei ngei pawhin sawi tur pawh ka nei mahna, mah se chutiang mi ka ni lo," tiin club leh player nen an inkara buaina awm sawi zui a tum lo.
A rawn let dawn
Mourinho hian football kalsan la tum lo a, rawn let hun la nei dawn. Chelsea leh Real Madrid manager hlui chuan, "Football-a ka let leh hma loh chuan nun pangngai neih ka duh a, media lam pawhin min zar buai lo se ka duh," tiin chawlh hahdam rih a mamawh thu a sawi.
Football luhchilh leh ngei a tum thu a sawiin Mourinho chuan, "Manchester United hian ka tel lo an kal thei a, keipawh Manchester United tel loin hmabak ka nei a ni," a ti.
Nomawi chawi thei bika an sawi Mourinho hun a liam ve hret hret tihin a ngaih theih a, United-ah hian Real Madrid leh Chelsea ang thoin ban a tawk. Amaherawhchu, United-a a hlawhtling lo chung pawhin Europa League leh League Cup-ah a champion a, a rawn let hun tur hriat ni lo mah se a hnawng rei lo ang.
Real an lang nghal!
Spanish chanchinbu El Pais chuan Real Madrid-in Mourinho lakluh an duh niin an sawi a, an tarlan dan chuan tunah thut thut ni loin nakkum July 1 aṭangin a ni thung. Los Blancos hian season tawp hnua an lalut a nih chuan pound maktaduai 4.5 an chawi tur chu an pumpelh thei dawn a ni.
Real Madrid-in Zinedine Zidane thlaktu Julen Lopetegui a hlawhtling tak loah khan Spanish manager thlakna tur an zawng a, October thla khan Mourinho nen an inbia niin an ziak a, hemi ṭum hian kum khat atan pound maktaduai 13.5 in an inbia. Tun ṭumah erawh a hlawh tur hi tisang leh tawhin kum khatah pound maktaduai 18 a hlawh dawn niin El Pais hian an ziak.
Hriat tel tura ṭha erawh hei hi thuthang chauh a ni a, Real Madrid hian Santiago Solari chu la nghet tawhin 2018 FIFA Club World Cup-ah final a hruai thleng. Hemi chungchang zawhna chhangin Solari chuan, "Real Madrid anga club lianah chuan hetiang thu thang hi a awm ve tur a ni," tiin menah a thlak thu a sawi.
Amaherawhchu Mourinho hi Real president Florentino Perez-a'n a atchilh niin sawi awm a, tuna thuthang hi Solari tan hriat nuam a ni lo ang.
Player an ṭawng chhuak
A chungchangah hian engtin pawhin sawi ṭhin mah se kei chuan lawmthu bak sawi tur ka hre lo. Ani zarah hian Old Trafford-ah bul ka ṭan thei a, a thil min zirtir zawng zawngah ka lawm bawk. Coach, i kal zelna turah duhsakna ka hlan a che. - Eric Bailly, United centre back
Hriat reng tlak nun hlui min hnutchhiah pui bakah remhriatna leh finna min hnutchhiah avangin ka lawm e. - Jesse Lingard, United midfielder hi social media lama harh vang ber a ni a, Mourinho chunga lawmthu sawina player zinga ziak hmasa ber a ni