India-in jersey thar nei

21st December, 2018

Indian football team chuan jersey thar an nei tawh dawn a, hun rei tak chhung Nike nena an thawhhona chu titawpin India sportswear brand Six5Six nen an thawkho tawh dawn.

India football team jersey thar hi Nilaini khan Delhi khawpuiah tlangzarhna neih a ni a, he hunah hian Mizo tlangval Jeje Lalpekhlua chu Indian football team jersey pho chhuaktu player zingah a tel.

Blue Tigers hian kum 2006 aṭang tawh khan khawvel huap pawha brand langsar Nike an thawhpui a, mahse American company hian team bungrua a thlawna an pek bak India hi pawisa a pe ngai lo.

Indian football team sumdawnna lam khawihtu Football Sports Development Ltd (FSDL) chuan Six5Six nen hian kum nga chhung atan contract an ziak a, AIFF chu kumtin vaibelchhe 1.5 - 2 inkar pawisa a pe ṭhin dawn bawk a ni.

Blue Tigers jersey thar hi www.six5six.in-ah lei theiha phochhuah a ni a, Rs.1,499-in a lei theih.

AFC Asian Cup khel tura inbuatsaih mek India hian player 34 an koh chhin zing aṭangin player 28 hming an puang leh tawh bawk a, Mizo tlangval Jeje Lalpekhlua, Lalruatthara leh Lallianzuala Chhangte te an la tel ve zel.

Chennaiyin defender Jerry Lalrinzuala chu koh chhin zingah tel mah se inhliam vangin inhnukdawk a, player 28 zingah a tel lo. Player 28 hi player 23-ah tih hniam leh tur a ni dawn a ni.

India squad player 28

Goalkeepers: Gurpreet Singh Sandhu (Bengaluru), Amrinder Singh (Mumbai City), Arindam Bhattacharya (ATK), Vishal Kaith (Pune City);

Defenders: Pritam Kotal (Delhi Dynamos), Sarthak Golui (Pune City), Sandesh Jhingan (Kerala Blasters), Anas Edathodika (Kerala Blasters), Salam Ranjan Singh (East Bengal), Subhasish Bose (Mumbai City), Narayan Das (Delhi Dynamos), Lalruatthara (Kerala Blasters);

Midfielders: Udanta Singh (Bengaluru), Pronay Halder (ATK), Rowllin Borges (NorthEast United), Anirudh Thapa (Chennaiyin), Vinit Rai (Delhi Dynamos), Halicharan Narzary (Kerala Blasters), Ashique Kuruniyan (Pune City), Germanpreet Singh (Chennaiyin), Lallianzuala Chhangte (Delhi Dynamos), Jackichand Singh (Goa);

Forwards: Sunil Chhetri (Bengaluru), Jeje Lalpekhlua (Chennaiyin), Sumeet Passi (Jamshedpur), Farukh Choudhary (Jamshedpur), Balwant Singh (ATK), Manvir Singh (Goa).