Bale-a hattrick nen final-ah Real Madrid

Khawvela club ṭha ber zawn­na inkhel FIFA Club World Cup semifinal-ah Gareth Bale chuan hattrick a siam a, Kashima Antlers chu 3-1 a hnehin final an lut.

Kashima Antlers tan Shoma Doi chuan goal khat khung ve mah se Asian champion tan European champion an la ṭha hret a, chak phu zawkin hnehna an chang.

Inkhel pumpui thlir pawhin Real Madrid-in chak an phu zawk - 67% ball an chang a, vawi 16 ngawt shot an neih laiin Kashima erawh vawi kua bak shot an nei thei lo.

Real Madrid boss Santiago Solari chuan, "Kashima laka kan khelh dang anga final-a khel turin kan inbuatsaih dawn a ni," a ti a, nomawi chawi ngei a tum.

Beisei loh Bale

Club World Cup semifinal-a Real an inlan hma hian Gareth Bale dinhmun ṭhat loh thu an sawi nasa a, Welsh forward hi hliam vanga a inlan beisei a ni lo.

Mahse, rin loh takin starting XI-ah Bale a tel a, Solari rinna a chhanletna chu goal thum a ni. Tottenham Hotspur forward hlui hian minute 44-naah Mar­celo nen an in one-two hnuin goal hmahruai a khung a, chawlhlawk hman zui a ni.

Second half-ah pawh Bale-a'n goal khung turin hun a mamawh rei lo. Minute 53-naah Kashima Antlers tlarhnung chetsual nangchingin goal ruakah a khung a, Japanese club an hawihai.

Minute hnih a liam ṭawk a, Bale bawk a inlar. Marcelo hnen aṭanga a ball hmuh chu angle tight tak aṭangin a pet lut a, minute 78-naa Doi-a pet luh chu Asian champions tan mualpho zualpui khuhna chauh a ni.

Fak rawh u

Hliamin a bawhbuai ngun ve tak Gareth Bale-a tan season duhawm tia sawi tur a ni lo. La Liga-ah match 14 khelin goal li chiah a la khung a, Nilaini zan inkhel hma hian inelna hrang hranga a goal khung zat chu goal sarih chiah a ni.

Mahse, Kashima lakah Bale-a danglamna hmuh turin a awm a, Welsh forward hian a thiam ngaiin a lo la thiam reng tih a lang - minute 60-naah a hliam damkawr avangin Solari-a'n a la chhuak.

Real boss Solari chuan, "Bale khan engkim a ti a ni ber. Kashima kha a duhthalin a nghaisa a, a goal khung a, a movement engkim mai kha a fuh em em vek a ni," tiin a player a fak hle.

Argentine manager chuan Bale chungah beiseina a nei sang tih sawi zawmin, "Bale khan tu nge a nih a, eng ang taka theihna nei sang nge a nih tih a pholang a, Inrinniah pawh a chhunzawm theih ka beisei," tiin a sawi.

Real hmabak

Inrinni zan dar 10:00-ah Real Madrid hian Club World Cup final an khel dawn a, an tum tur hi inelna thlengtu UAE champion Al Ain an ni. Inrinni zan dar 7:00-ah hian pathumna inchuhin Kashima leh River Plate an inhmachhawn bawk ang.

Real Madrid hian a zawnin Club World Cup nomawi hi an lo chawi tawh a, Inrinni zanah hnehna an chang leh a nih chuan a zawnin season thum an champion dawn tihna a ni.

Inrinni zana Real tana innghah­na ni leh tur Gareth Bale-a'n hattrick a siam khan Club World Cup-a hattrick siam thei pathumna a ni a, a hma hian Cristiano Ronaldo leh Luis Suarez ten an lo siam tawh bawk.

Tuna zawhna awm erawh Bale hian coach Solari beisei angin final-ah a chet ṭhat a chhunzawm thei ang em, tih a ni a, a chungah mawhphurhna a innghat sang hle ang.

Al Ain bel ila

UAE club hi Mizo zingah hriat an hlawh lo a ni mai thei a, Real hian an zuam lutuk a nih chuan an zuam sual ang - inelna thlengtu ram champion an nih avanga inlan ve chauh ni mah se an sulhnu a hrawl hle.

An match hmasa berah Ocea­nia Champions League cham­pion Team Wellington chu hun pangngaiah 3-3 a an inhnehtawkpui hnuin penalty hmangin an hneh a, quarterfinal an lut.

Quarterfinal-ah pawh Al Ain-in goal khung an uar chhunzawm a, African champion Esperance de Tunis chu 3-0 in an sawp - semifinal-ah rin loh takin River Plate an hneh zui a, Real tan hneh loh theih an ni.

Al Ain hian Sweden inter­national, season hmasaa match 33-a goal 33 khungtu Marcus Berg leh Brazilian winger ṭha Caio te an kawl a, an rama khel tur an nih bawk avangin inrintawkna leh phurna nen Real an hmachhawn ang.