Arsenal 'invincible' ang kan ni thei - Lovren

Kum 2004 khan Arsenal chuan Premier League-ah tlawm miah loin nomawi an chawi a, hminglem atan 'The Invincibles' (Hneh theih loh) tih hminglem pek an ni.

Tun season Premier League-a la tlawm miah lo Liverpool defender Dejan Lovren chuan Arsenal sulhnu an chhui theih a rin thu a sawi a, "Season tawp thlenga tlawm miah loa kan kal theih ka beisei a ni," a ti.

Livepool hian league match 17 khel tawhin tun season Premier League-a la tlawm lo awmchhun an ni a, anmahni hnaih bertu Manchester City aiin point khatin an sang mek.

Lovren chuan, "Arsenal pawhin an lo ti thei tawh a, engvangin nge kan theih loh bik ang?" tiin zawhna a siam a, Arsene Wenger hnuaia Arsenal vanglai an tluk theih thu a sawi.

"Chona phurawm tak a ni dawn a, mahse he chona hi kan duh chu a ni a, kan ti thei tih kan hria a ni," tiin English football-ah Reds champion pui a tum hle.

Arsenal chuan 2003-04 season khan tlawm miah loin league nomawi an lo chawi tawh a, Premier League bika tlawm loa champion awmchhun an ni. English top flight football bikah chuan 1888-89 season khan Preston North End chu tlawm loin an lo champion tawh bawk.

Lovren-a'n tlawm loa season tluan an hman theih tur thu sawi mah se Manchester City ṭhatna erawh a hmuh hmaih lo. Croatian defender chuan, "City hian chak lohna lai an neih awm reng reng ka hre lo.

"Season hmasaah point 19 ngawta sang falin an champion a, hnehna chan loh an neih pawhin insiamṭhat dan an hre zel a ni. Season hmasa pawh khan match hnih khatah an tlawm ve a, mahse point 19-in an sang fal thei tho," a ti.

Lovren chuan City nena inum erawh nuam a tih thu sawiin, "Inelna a awm a, mahse hei hi kan duh chu a ni. Tu nge kan hmaah ding kan ngaihtuah lo a, a pawimawh ber chu keimahni hi a ni," tiin an kutah engkim a innghah thu a sawi.

Liverpool hian zanin dar 1:30-ah Premier League match an khel dawn a, Wolverhampton Wanderers khelmualah an leng lut ang.