NBA record siamtu Rockets

Houston Rockets chuan Washington Wizards lakah 3-point vawi 26 ngawt an vawm lut a, NBA match khat bika 3-points nei hnem ber record an siam - season kal laia vawi 16 an chakna chiah a ni nghal bawk.

Kum 2017 March 3 khan LeBron James awm laiin Cleveland Cavaliers chuan match khatah vawi 25 ngawt mai 3-points an vawm lut tawh a, kum hnih pawh a liam hmain he an record ṭha tak mai hi an rawn khum leh ta a ni.

Nimin zing inkhelah Rockets tan hian a dan pangngain James Harden chu player hmuhnawm leh thawhhlawk ber a ni leh. Most Valuable Player nilai Harden hian point 35 a nei leh a, 3-point shot vawi 11 a neih zinga paruk chu a hlawhtling.

Season bul ṭan fuh lo Houston Rockets hi tun hnaiah an thochhuak leh ta, an match hnuhnung pangaah hnehna chang vekin Western Conference table-ah pasarihna an ni phak leh tawh.

Kum 29 mi Harden chuan, "Player chauh kan ni lo, pawn lama min ṭantu thlengin kan khingpui kan nawr vek," tiin a sawi. Toyota Center-a inkhel entu mipui chuan "Shoot it! Shoot it!" tiin an player-te an lo au phur nasa hle a ni.

Nimin zing inkhel dangah NBA champion lai Golden State Warriors chu Utah Jazz lakah 108-103 in an tlawm, Steve Kerr-a enkawl GSW hi season kal laiah vawi 11 an tlawmna niin ṭum 21 an chak tawh thung.

Utah Jazz tan hian Joe Ingles-a'n point 20 neiin a score hnem ber a, point 17 a neih baka rebound ṭum 15 latu Rudy Gobert a thawhhlawk hle bawk. Golden State tan Stephen Curry (32points) leh Kevin Durant (30) te khel chhe lo mah se player dangten an thlawp ṭhat tawk loh avangin chak lo zawkah an ṭang.