January 6, Thawhlehni zana chief minister Lalduhoma kaihhruaia Cabinet room-a Council of Ministers ṭhukhawm chuan, Chakma Autonomous District Council (CADC) chhui chiang tura inquiry commission din leh Governor's Rule-a dah chu ṭul loah an ngai.

Mizoram Governor-in CADC chhui tura inquiry commission din leh Governor's Rule-a dah chungchanga an ngaihdan a hriat duh avangin Council of Minister hi an ṭhukhawm a; an sawiho hnuah thil pahnihte hi ṭul loah an ngai a ni.

Sorkar thuchhuah tarlan danin, CADC kalphung chhui chiangtu inquiry commission din a lo ni tawh a, commission chuan report an thehlut tawh. Chumi hnuah autonomous district council pathumte kalphung zir chiangtu study team din leh a ni a, hei hi Chief Secretary-in a kaihruai a, report sorkarah an thehlut tawh. Lawngtlai Bawrhsap pawhin CADC chungchang report a thehlut tawh bawk.

Council of Ministers chuan report thehluh tawh pathumte chu a ṭha tâwkah an ngai a, a hranpaa inquiry commission din thar leh ṭul an ti tawh lo a ni.

Governor's Rule-a CADC dah chhunzawm leh chhunzawm loh chungchangah Council of Ministers chuan, MDC 20 awmna CADC-ah hian member 16 neia sorkarna siam thei party an awm avang leh, high court-in sorkarna siamtir dan kawng zawng tura thurawn a pek tawh angin Governor's Rule-a dah loa sorkarna siamtir tura ngenna an lo siam tawh thu an tarlang. Mahse, Council of Ministers ngenna ang loin Governor's Rule-ah dah a ni zui thung.

Governor's Rule term a zawh hnuah pawh sorkarna siam thei party-te'n an dinhmun sawh sawn loa sorkarna an la siam theih reng avangin Governor's Rule-a thla ruk dang dah leh a ṭulna chhan (political instability) a awm lo-ah Council of Ministers an ngai a; CADC-ah sorkar ngêlnghet tak a ding theiah an ngai a ni.