KHAWTHLIR

MP-in kâwm

Lok Sabha MP Richard Vanlalhmangaiha chuan December 6, Thawhlehni khan Ministry of Finance-a Department of Expenditure secretary Vumlunmang Vualnam chu a pisaah a kâwm. MP hian PMGSY 1 leh 3, Rural Development Ministry-in Finance Ministry hnena extend a dil mek chu a tihhlawhtlinsak chuan Mizoramah PMGSY 1 leh 3 hna la thawh zawh loh tam tak a awm avangin Mizorama PMGSY contractor-te tan thil lawmawm tak a nih tur thu a sawi a, hma laksak turin Vumlunmang Vualnam a ngen a ni.

Republic Day

Aizawl bawrhsap Lalhriatpuia hoin nimin khan DC Conference Hall-ah kumin Republic Day hman dan tur rêl a ni a, sorkar department hrang hrang aiawhte bakah, pawl hrang hrang aiawhte an tel. Kumina Republic Day chu Lammualah lawm a ni dawn a, Larsap Gen. Vijay Kumar Singh chu khuallian tur niin, zing dar 9-ah ṭan a ni ang. Lammuala hun hman zawhah sawm bikte tan Lok Bhavan-ah Governors' At Home buatsaih a ni bawk ang.

Kawng chanve khâr ṭhin dawn

Traffic SP C Vanlalvena chuan thupek tichhuakin, vawiin aṭanga January 24, 2026 thleng Khatlaa Industry office bulah tui luankawr (culvert) siam a nih dawn avangin hna thawh chhungin kawngpui chanve khar a nih dawn thu a tarlang a; fimkhur tur leh hna thawktute ngaichang chunga lirthei khalh turin mipui a hriattir. Culvert siam chhungin Peter Street - Tennis Court inkara zing dar 9-10 inkara lirthei tlan khapna chu hman rih loh tur a nih thu a tarlang bawk.

Hnathawhna tur hlân

Minister of state B Lalchhanzova chuan nimin khan a pisaah MLA fund aṭangin bial Aizawl East-II biala Chhinga Veng Branch YMA hnenah gym tihchangtlun nan Rs 7,00,000 leh Dawrpui Badminton Club hnenah Badminton Hall tihphuisui nan Rs 2,68,000 a hlan. B Lalchhanzova chuan, ṭhalaite’n infiamna leh insawizawina lamah hma an sawn zel theih nan theihtawp chhuah zel a tum thu a sawi.

PMDDKY sawiho

Mamit District Committee on Pradhan Mantri Dhan Dhaany Krishi Yojana (PMDDKY) chu an chairman K Laltlawmlova, bawrhsap kaihhruaiin nimin khan an ṭhukhawm. Meeting-ah hian sorkar laipuia Directorate of Jute Development director Jintu Das pawh a tel a; PMDDKY, NFSNM & Pulses and Oilseeds Mission hnuaia Mamit district-a hmalak tawhna leh hmalak zel dan tur thlirho a ni.

District Planning

Aizawl district bawrhsap Lalhriatpuia hoin nimin khan District Planning Committee an ṭhu a; District Catalytic Intervention Plan-a telh tura project siamte thlirho niin, plan-a telh turte an thlang. Ṭhutkhawmah hian Aizawl South-II bialtu MLA Lalchhuanthanga pawh a tel a, deparment tinte chu an project ṭheuh tihhlawhtlin a nih theih nan theitawp chhuah turin a chah.

Sa tihhlum khap

Serchhip district bawrhsap Paul L Khuma chuan thupek tichhuakin, silai leh hmanraw dang hmangin sava leh ramsa pêl/man/tihhlum khap a nih thu a puang. Thupek zâwm lo chu Bharatiya Nyaya Sanhita, 2023 Section 223 hmanga hrem theih an ni tih a tarlang.