Sa leh bawnghnutea intodelh turin ṭan lak nasat a ngai - Vety Minister

Animal Husbandry and Veterinary minister C Lalsawivunga chuan nimin khan Mizoram State Veterinary Council conference hall-ah AH&Vety dept officer-te inhlan tharna hun a hmanpui a; sa leh bawnghnutea intodelh turin ṭan lak nasat a ngaih thu a sawi.

C Lalsawivunga chuan, sa leh bawnghnute thar chhuaha intodelh turin ṭan lak nasat a ngaih thu sawiin, "Hemi atana pawimawh tak ran chaw chin leh sawngbawlna lama harsatna awmte sutkian dan tur ngaihtuah a ṭul," a ti a; kumtluana theihtawp chhuaha mahni mawhphurhna ṭheuh tha taka hlen turin AH& Vety dept-a thawkte a chah.

AH&Vety Minister chuan, department officer-te chu kum tharah rilru leh inpekna thar nen an thiamnate mamawhtute tana ṭhahnemngai taka hmang turin a fuih a, "Mipuite'n kan lakah leh department chungah beiseina sang tak an nei a, mipui beiseinate tihlawhtling thei turin ṭhahnemngai takin i thawk ang u," a ti.

Inhlan tharna hun hi AH&Vety secretary C Lal-sangliana'n a kaihruai a, chawhnu lamah department hmalakna tur hmachhawpte sawiho a ni.