Esther Hnamte lawmpuina hlan

Women & Child Development directorate chuan nimin khan IPR Auditorium-ah a zaithiam vanga India rama naupang chawimawina sang ber Pradhan Mantri Rashtriya Bal Purashkar dawngtu Esther Lalduhawmi Hnamte, Lunglei College Veng chu lawmpuina an hlan a; Social Welfare, Women & Child Deve-lopment minister Lal-rinpuii'n a hmanpui.

Lalrinpuii chuan, Mizorama hmeichhia leh naupangte dinhmun chawi kannaa hma latu department an nih avangin department pawimawh an nih thu a sawi a, "Esther Hnamte hi Mizoram, India pumpui leh khawvel hmaa Mizote hmel tilangtu a ni a, Rashtriya Bal Purashkar award a dawn theihna tura hma nasa taka latu North East Zone Cultural Centre leh Art & Culture department-te hmalakna a chhuanawm hle a ni," a ti.

Pradhan Mantri Rashtriya Bal Puraskar hi Ministry of Women & Child Development-in naupang chhuanawm bikte hnena a hlan ṭhin a ni a; category pasarih - Bravery, Art & Culture, Environment, Innovation, Science & Technology, Social Service leh Sports a awm. Esther Hnamte hian Art & Culture huangah chawimawina a dawng a, December 26, 2025 khan President Droupadi Murmu-i'n a hlan a ni.