Work dept-te kalphung a ṭha zawngin tihdanglam tum a ni - CM Lalduhoma

Chief minister Lalduhoma chuan nimin khan Secretariat Complex-ah Engineers' Centre sakna tur lungphûm a phûm a; work department-te kalphung a ṭha zawnga tihdanglam tum a nih thu a sawi.

CM Lalduhoma chuan, work department-te kalphung zir chiang a, kalphung ṭha zawk siamtu tur study team din a nih thu a sawi a, "An report pawh thlirho a ni tawh. Study team-in ṭha zawka hmalak dan tur leh insiamṭhatna tur rawtna an neihte bawhzuia works lama kan kalphung tam tak hi a ṭha zawnga tihdanglam tum a ni," a ti.

Mizoram chu eirukna lakah a fihlim tawh nia sawiin Lalduhoma chuan, "CMS India Study chuan NITI Aayog leh Transparency International data-te aṭanga an teh danin, tunah hian Mizoram hi India rama eirukna tlem lama pahnihna kan ni. Pakhatna chu mihring sing sarih vel chauh chenna Laksadweep union territory a ni," a ti a, state zingah Mizoram chu pakhatna a nih thu a sawi.

Chief Minister chuan, Mizoram Engineering Service Association (MESA) member-te'n Engineers’ Centre sakna atan sum an thawh khawm chu fakawm a tih thu a sawi a, "Sorkar engineer-te hi kan ram hmasawnna ruhrel dinna kawng tinrenga mawhphurtute in ni a, in kutah hmasawnna hnathawhna tur sum pawh a lut hnem a, inpe zo taka hna in thawh kan beisei tlat a ni," a ti.

Rêl kawng aṭangin hmasawnna ruhrel ṭha pakhatin Mizoram economy a nghawng theihzia hmuh theih a nih thu sawiin Lalduhoma chuan, "Sairang thleng rêl rawn lut hian mipui nâwlpui tan zin chhuah a tiawlsam a, kan sumdawngte'n man tlawm zawkin bungrua an la lut," a ti a, khualzin rawn lut an tam a, tourism industry a kân phah thu a sawi.

Engineer-te hian Zarkawt Babutlângah Engineers’ Club an nei ṭhin a, an hna chungchang sawiho nan, inkhawmpui nan, Aizawl pawn lama awmte Aizawla an kal chânga thlen nan leh ṭul dang atan an hmang ṭhin.

Engineer-te building leh ram chu kum 2011 khan sorkarin Zarkawt YMA hnenah Stadium cum Recreation & Parking Centre atan a pe a; hmunhma pe leh tura vawi tam tak thuneitute an dil hnuah sorkar chuan June 12, 2024 khan MINECO-ah hmun a pe a ni.

Engineers’ Centre hi engineer-te tan chauh ni lo, sorkar department dang te, pawl, kohhran leh mimal thlenga hman theih tura sak tum a ni a; a sakna atan engineer-te'n Rs 21,83,000 an thawhkhawm tawh a, thawh zel an tum a ni.