Larsapin LADC sorkar siamna tura order a chhuah tawh a sût

Governor Gen. Vijay Kumar Singh chuan, Lai Autonomous District Council (LADC) sorkar thar siamna atana order a chhuah tawhte chu January 6, Thawhlehni khan a sût.

LADC-a sorkar siamtir tura ngenna thehluttu MNF leh ZPM MDC-te thawh dunna, Lairam Legislature Party (LLP) aṭangin January 6, 2026 khan MNF an inhnûkdâwk a, hei vang hian LLP hian sorkarna siam turin MDC an ngah tâwk tawh lo. Larsap chuan LADC atana order a lo chhuah tawhte chu a sût zui ta a ni.

Governor hian LLP leader T Zakunga rawtna anga protem speaker atana Lallura Chinzah a ruatna te, LADC sitting hmasa ber January 7 (nimin) a ruatnate leh LADC chairman thlan hun atana January 7 a ruatnate chu a sût leh vek a ni.

Lallura Chinzah hi December 22, 2025 khan Lunglei bawrhsaop Donny Lalruatsanga chuan LADC Hall-ah rinawmna thu tiam tirin LADC protem speaker atan a lo lalut tawh a ni.

Tarlan tawh angin MNF chuan January 6 khan Governor hnenah lehkha thehlutin, LLP aṭangin political problem avanga MNF chu an inhnuhdawh thu an hriattir a ni.

LADC-ah sorkar siam dun turin ZPM Legislature Party leh MNF Legislature Party chuan December 15, 2025 khan thawhhona thuthlung an ziak a; leader (chief executive member) atan T Zakunga, ZPM MDC an thlang.

Thawhhona thuthlung ziah a nih dan chuan, ZPM-in CEM bakah executive member panga an chang dawn a; MNF-in deputy CEM bakah executive member pathum an chang ang. A bak zawng chu House Leader leh MNF Legislature Party inrâwnna anga hnawhkhah tur a ni.

MDC 25 awmna LADC inthlan hnuhnung berah khan MNF-in MDC pariat, INC-in MDC pasarih, ZPM-in MDC paruk leh BJP-in MDC pahnih an la a; independent-in mi pahnih an tling bawk.