Khualzinte hmanga khawtlang tihmasawn turin khual chhàwn thiam nih a ṭul - Speaker

Phuaibuang Tlaizawng Paradise chu nimin leh nizan khan hman chhunzawm a ni. January 6, Thawhlehni zan khan Phuaibuang khelmuala hun hman chu Assembly speaker Lalbiakzama, bialtu MLA-in a hmanpui a; khualzinte hmanga khawtlang tihmasawn turin khual chhàwn thiam khawtlang nih a ṭul thu a sawi.

Lalbiakzama chuan, Tlaizawng Paradise chu anthurium leh hnahsin baka pangpar hming chawia hunpui buatsaih pathumna a nih thu a sawi a, "Khualzinte kaltlanga eizawnna hrang hrang siam nan leh tourist hmanga khawtlang tihmasawn tur chuan khual chhàwn thiam khawtlang nih a ṭul a, khualzinte dàwl zo tura thlen in ṭha, ei leh in lam theihna, khualzin dawnsawn leh kaihhruai kawnga thiamna bik nei mi (tour guide) an awm a ṭul a, khawtlang hawi zau, hawihhâwm leh ṭangrual nih a ngai," a ti.

Phuaibuang khua leh a chhehvel sik leh sa awm danin a zir avangin khualzin tam zawk hîp thei turin tlaizawng phun belh zel a pawimawh thu sawiin Lalbiakzama chuan, "Mizoram pangpar zinga hmun pawimawh tak luahtu, hla phuahtute pawhin vawi tam tak hla thua an zeh tel pangpar a nih avangin tihlara zinmi tam zawk hîp thei khawpa hmalak zel a pawimawhi," a ti a; phuisui zawka Tlaizawng Paradise buatsaih a nih zel theih nan thawhhopuiah khawtlang mipui a sáwm.

Phuaibuang VC president C Lallianzama chuan, Tlaizawng Paradise chhim tura mikhual chhinchhiah chu mi 1,000 chuang an nih thu a sawi a; Tlaizawng Paradise zan khatnaah Phuaibuang khaw mite kutchhuak thil chi hrang hrang leh ei tur pho chhuah a ni a, zaithiamte an zai bawk.