Hlawh tihsan leh nihphung ṭha zawk phûta mass casual leave la mek Federation of Mizoram Samagra (RMSA & SSA) Employees (FEMSE) te chu vawiin aṭanga an hna chhunzawm vek turin Mizoram sorkarin a hriattir a; he mi chungchangah hian Human Resource Development (HRD) Board vice chairman L Thangmawia'n November 23, Inrinni khan thuthar thehdarhtute a kâwm. FEMSE erawh chuan chawlh an lâk chhunzawm dawn thu an sawi.
L Thangmawia chuan Inrinnia a pisaa press conference a neihnaah, FEMSE-te'n ni thum chhung (November 21, 22 & 25) mass casual leave an la chu inhriattir lâwkna a awm loh avangin sorkar a barakhaih tak zet tih a sawi a, "An chawlh chhan hi FEMSE aṭangin sorkarin vawiin thlengin official-in a la dawng lo," a ti. FEMSE lamin School Education Minister dawhkânah ngei an dah nia sawi chungchangah, an dah a nih chuan chhui theih a nih a rin thu a sawi.
A sawi danin, FEMSE member-te zingah primary school zirtirtu 550, middle school zirtirtu 1,643 an awm a; high school 93 leh higher secondary school parukah FEMSE member an awm a ni.
Tunlai hi sikulah exam nei mek leh hmabak mekte an nih avangin zirtirtute nuar chu zirlaite tan a pawi hle dawn thu sawiin Thangmawia chuan, "Hun khirhkhàn lai tak remchanga hmanga naupangte hmakhua tihchhiat pawisa loa lungawi lohna an lantir hi sorkar tan pawmzam theih a ni lo. Chuvangin, nawrh an huaihawt mekah hian sorkar chuan 'No work, no pay' a kalpui dawn," a ti.
L Thangmawia chuan, sorkarin zirlaite hmakhua ngaiin FEMSE-in nawrh titawp se a duh tak zet tih sawiin, "November 25, Thawhṭanni aṭangin an hna chhunzawm vek turin zirtirtu zawng zawng a hriattir a, sorkar hriattirna zâwm lote chungah a ṭul angin action a la dawn a ni," a ti a; sorkarin action a lak dan tur erawh sawi theih a la ni lo tih a sawi.
Samagra Shiksha-a State Project Director chuan November 22, Zirtawpni khan order chhuahin, FEMSE member-te chu vawiin aṭanga hna thawk chhunzawm vek tur leh, mass casual leave vanga hna zawm lote chungah action lak a nih tur thu a hriattir a ni.
FEMSE President erawh chuan, vawiin hian mass casual leave an lak chhunzawm dawn thu leh, vawiin vêk hian an kal zel dan tur an rêl dawn thu Vanglaini a hrilh.
HRD Board Vice Chairman sawi danin, SSA leh RMSA-te Samagra Shiksha-a chhûn fin a nih hnuah thawktute hlawh chu sorkar laipuiin a tihniam a, mahse, Mizoram bikah chuan a hmaa an hlawh ang an lak zel theih nan Mizoram sorkarin state sorkar sumin a hnawhkhahsak a, chuvang chuan hlawh atan ringawt kum khatah cheng vbc. 27 a sen belh a ngai dawn a ni. Vbc. 27 bakah hian, state matching share 10% a pek a ngai bawk.
L Thangmawia chuan, SSA (Elementary) employee-te'n an service chungchangah Mizoram sorkar chu Guwahati High Court Aizawl Bench-ah an khing mek [WP(C) No. 128 of 2019] tih sawiin, "Court thu kal lai a nih avangin Court-in a rel fel hma chuan an chungchanga hmalakna kal mek pawh sorkar tan thutlukna siam theih a ni rih lo," a ti a; chutih rualin, Samagra Shiksha hnuaia thawkte dinhmun siamṭhat sorkarin a duh a, ngaihtuahna a hmang mek niin a sawi.
FEMSE-te'n School Education hna lakah Samagra-a thawkte tan 70% hauhsak tura an phût chungchanga zawhna chhangin Samagra hotute chuan, "Samagra kaihhruainaah hausak tur tih a awm lo a, state-in a la tur a ni, tih a awm lo," an ti. Zawhna dang chhangin, "SSA leh RMSA-a thawkte state sorkarah dah ngheh (regularise) an la awm lo," an ti bawk.
School 2nd term exam hun
P/S - November 13-22, 2019
M/S - November 25 - December 6, 2019
H/S - December 3-13, 2019
HSS - November 4-18, 2019
