Tottenham-in chakin bul an ṭan

Premier League-ah Jose Mourinho a rawn inlar leh ta a, Inrinni zan khan Portuguese manager enkawl Tottenham Hotspur chuan London Stadium luhchhuahin West Ham 3-2 in an hneh.

Tottenham inkhel hian Mauricio Pochettino thlaktu Mourinho vangin ngaihven a hlawh a, hemi hma press conference-ah pawh Chelsea leh Manchester United manager hlui kawm châk an tam avangin Spurs-in dilna ṭhenkhat an hnawl hial.

Khelmualah pawh Mourinho kaihhruai Spurs an nung ṭha a, Asian tlangval Son Heung-min langsarin minute 35-naa goal hmahruai a khung bakah minute 43-naa Lucas Moura khung tur ṭha zetin a siamsak bawk. Second half ṭan chiahah pawh Harry Kane-a'n Mourinho hnuaia a 'goal account' hawngin minute 49-naah Serge Aurier cross ball a tauh lut. Hun tawp lamah erawh substitute Michail Antonio-a'n minute 73-naa ṭha zeta a khung avangin Hammers an nung thar a, Angelo Ogbonna-a'n injury time-a a khung leh bawk avangin Spurs hi 3-2 chiahin an chak.

Manchester United-in December 18, 2018-a an ban hnuah Mourinho chu mual sirah a rawn inlan leh ta a, Spurs manager thar chuan, "Ka rilru a phawklek em? teuh lo. Ka hlauthawng em? teuh lo. Nuam ka ti a, ka awmna ṭhinah ka rawn let leh mai a ni. Thudik ka sawi dawn a nih chuan ka tan chuan thla 11 chhung kha hrehawm ka ti a, pre season nei loa club leh manager te hnathawh thlir kha awm thiam a har a ni," tiin a hna chelhah a lungawi thu a sawi.

Pa danglam Mourinho chuan sawi chhunzawmin, "Tuna kan hnehna hi ka hnathawh vanga ngai ho chu ka haw ngawt ang. Keimah vang a ni lo a, player leh club vang a ni zawk," tiin a sawi a, inkhelh ṭantirh minute 60 chhung an khelh dan chu a lungawi thlak thu a sawi bawk.

Tottenham hian Thawhlehni zanah Olympiakos chu Champions League-ah an mikhual dawn a, Mourinho-a'n khawvela stadium ṭha ber tia a sawi Tottenham Hotspur Stadium hmuna a team thar a enkawl hmasak ber tur a ni.