Lawm hlawh lo Bale tan kut an beng

Inrinni zan Spanish La Liga-ah Gareth Bale kan hmu leh ta a, Real Madrid chu an mikhual Real Sociedad lakah 3-1 in hnehna a chanpui. 

International break a nih laia Real tih elna banner thla a lakpui avanga sawisel hlawh forward hi bench aṭanga luhtir a ni a, Santiago Bernabeu-ah fan-ten an au el nasa hle. Mahse, fan-te diriamna en liamtu Bale-a'n ṭha takin Madrid tan khelmualah a theihna a pholang a, hun a tawp meuh chuan kut beng chungin Welsh forward hi lawm a ni. 

Inrinni zan inkhel dangah Barcelona chuan 2-1 in Leganes an hneh hram a, table chung ber luah chhunzawmin Real nen an point hmuh zat a in ang. 

Santiago Bernabeu-ah inkhelh hmain squad-a player hming chhiar chhuah a ni a, Gareth Bale hming lam a nih laiin auh elna thawm a ring hle. Hun tawp hamrik a rik meuh erawh chuan fan-te ngaihdan a dang ta thung a, Bale-a khelh ṭhat miau avangin kut bengin an lawm - Welsh forward hi an goal thumna a luh theih nan a pawimawh a, tlarhnung a pui ṭha takzet bawk. 

Real hian minute hnihna lekah goal an chhuah nghal a, Sergio Ramos ball pet sual nangchingtu Jose chuan goalkeeper Thibaut Courtois a tlan hel hnuah an goal hmasa ber a khung. Sociedad-in huaisen taka an nawr chhunzawm chungin team ṭha danglamna a lang a, Karim Benzema, Federico Valverde leh Luka Modric ten goal khungin Real an chak. 

Barcelona-in an mikhualna ramah goal chhuah hmasa mah se an insiamṭha a, second half-a goal hnih an khung hmangin khualmualah Leganes chu 2-1 in an hneh. Leganes hian minute 12-naah Youssef En-Nesyri goal mawi bik hmangin hmahruaina goal an khung a, Oscar Rodriguez chuan belhchhahna remchang a nei chungin a hun ṭha neih goal-ah a chantir thei lo. 

Barca hi khualmualah vawi thum an tlawm tawh avangin an hlauthawng tih hai rual a ni lo a, mahse second half-ah an insiamṭha - Luis Suarez chuan minute 57-naah tawih zetin a tauh lut a, si phurh a sut. Minute 79-naah Chilean midfielder Arturo Vidal chuan vannei zetin an goal hnihna a khung ve leh a, Barca an chak - Gerard Pique chuan post a tih per ve bawk. 

An elpui ber Real Madrid leh Barcelona chak laiin Atletico Madrid erawh an chak zo ve lo a, an mikhualna ramah season hmang ṭha tak Granada nen 1-1 in an inhnehtawk. Atletico hian league-a an match hnuhnung paliah vawi thum chu an khingpui an inhnehtawkpui a, vawi khat chiah an chak - table-ah pathumna dinhmun an luah chhunzawm a, point thumin Barca leh Real an thlau ta. 

Diego Simeone enkawl team hian league match 14 an khelh tawhah an khingpui chu vawi sarih an inhnehtawkpui! Vawi ruk an chak tawh a, an chak aiin draw an neih zat a tam zawk. Atletico tan left back Renan Lodi chuan minute 60-naah goal hmahruai khung mah se Granada tan hian kum 33 mi Germán Sánchez chuan minute sarih hnuah a sut a, goal dang a luh loh avangin point an insem.