Vawiin aṭangin tennis inelna lian
Tualchhung tennis inelna lian ber 2nd Aijal Club Challenger Tennis League chu vawiin aṭang hian Aizawl Tennis Club-ah khelh ṭan a ni dawn a, inkhel hi Zonet HD leh Rihnim lamah live-a en theih a ni ang.
Match hmasa berah team thar pahnih Ngopa Warriors leh Bethlehem Vengthlang Tennis Club an inhmachhawn dawn. Ngopa hi an khaw tlangval hun rei tak Mizoram number 1 ni tawh Ramengmawia hoin an inlan dawn; BVT lamin tualchhung player ṭha, number 2 ni lai K. Lalrinawma an nei thung a ni.
Champion lai Zarkawt Xenons leh Chanmari Slammers te tlai lamah an inhmachhawn zui dawn a, anni team pahnih hian tualchhung player bakah state pawn aṭanga chah luh an ngah avangin an inkhel a hmuhnawm dawn.
2nd Aijal Club Challenger Tennis League-ah hian team panga - Zarkawt Xenons, K-12 Tennis Academy, Chanmari Slammers, Ngopa Warriors leh Bethlehlem Vengthlang te an inhmachhawn dawn a, an inkhelh kual vek hnuah a sang pahnihin final an khel ang.
Inelna hi men's singles, men's doubles, women's singles, mixed doubles, boys under 16 leh 35+ doubles hmanga neih tur a ni. Match tin hi set khat hmanga khelh tur a ni a, match zawng zawng khelh zawh a nih hnuah an game lak belhkhawm niin chuta ṭang chuan result siam a ni dawn.
Vawiin Inkhel Tur
Ngopa Warriors 12:30 PM Bethlehlem Vengthlang
Chanmari Slammers 04:30 PM Zarkawt Xenons
November 26, Thawhlehni
Ngopa Warriors 12:30 PM Chanmari Slammers
Bethlehem Vengthlang 04:30 PM K-12 Tennis Academy