Chawnpui a par leh ta

Mizoram Premier League Season 8-ah Chawnpui FC-in Zirtawpni zan khan FC Venghnuai 3-2 in an hneh a, tun season-a a vawi khat nan relegation zone chhuahsanin paruknaah an inhlangkai.

Match khat chauh khelh tur awm tawhah Ramhlun North, FC Venghnuai leh Chawnpui FC te chu relegate thei an ni a, match tawp berah engkim a chiang chauh ang. Lammual inkhel hmuhnawmah Chawnpui FC-in Vanlalthlamuana hmanga goal hniha hma an hruaina chu FC Venghnuaiin Laldampuia leh Vanlalthanga hmangin sut mah se, Chawnpui tan Lalnunpuia Tlau-in (Bawihpuia) minute sarih chauh a awm tawh tihin chakna goal a khung.

FC Venghnuai tan MPL khel zel turin point khat a tawk a, Chawnpui FC tan chak ngei a ngai thung. Point thum mamawh zawk Laldinthara hoten bul an ṭan ṭha a, minute 15-na lekah Thlamuana'n a khung. Venghnuai keeper RS Lallawmzuala chuan Larry Lalrinawma leh Lathlamuana (Tamu-a) te pet a dang a, a vawi thumna Ramhlun South tlangval Thlamuana pet erawh dan ngaihna a awm tawh lo.

Minute 20-naah Moody Lal-awmpuia corner pet chu mawi zetin Thlamuana'n a tauh goal a, FC Venghnuai beiseina siam turin minute khat hnuah Laldampuia'n a khung ve nghal zat. Second half-ah Vanlalthanga'n halfway line pelh hret aṭangin goal-ah a 'risk' a, Lammual inkhel entuten goal ropui an hmu. Hualngohmun tlangval hi Mizo ball pet thiam zinga sawi kai pha a ni a, season liam ta khan Chawnpui kawr hain Aizawl FC lamah goal ropui a khung 

tawh bawk.

Hun tawp lamah Venghnuai keeper RS Lawmzuala'n Chawnpui striker Bawihpuia bum a tum a, mahse Rangdajied striker hlui hian chhuhsakin chakna goal a khung. 

Chawnpui FC-in HC Zarzo-liana hnuaia an chet ṭhat tawk loh avangin season liam taa parukna nihpuitu an veng pa Laldinthara an lalut a, coach thar hnuaiah an match hmasa berah Chhinga Veng lakah 5-2 in an tlawm.

Amaherawhchu hemi hnu hian Chawnpui hian match thum khel leh tawhin point sarih an hlawh chhuak a, Thara awm chin match hnuhnung pali bik thlir chuan Chawnpui hian point sarih hmuin an tluk loh chu Mizoram Police (10 pts) chiah an ni.

Chawnpui coach Laldinthara chuan, "Team angin kan ṭang rual a, tlawm kan duh lohna rilru hian kan team min tichak a, kan rilru put hmang a dik chhoh avangin result ṭha kan neih phah. Mizoram Police nena kan inkhelh turah pawh theihtawp chhuahin point hmuh ngei kan tum a, midang result a innghat loin MPL khelh zel kan tum," tiin Vanglaini a hrilh.

November 28, Ningani tlaiah Ramhlun North leh Chanmari FC te an inkhel dawn a, RNFC hi an chak loh chuan an relegate dawn. Chutiang bawkin Chanmari FC hian point thum an hlawhchhuah loh chuan palina chinah an tel pha dawn lo.

Chawnpui hian November 29, Zirtawpni tlaiah Mizoram Police an hmachhawn leh chiah ang a, hnehna an chan chuan FC Venghnuai aia head to head-ah an ṭhat zawk avangin an him nghal. An chak zo lo a nih erawh chuan league round tawp bera FC Venghnuai leh Electric Veng FC te inkhel result an nghah a ṭul ang.