Chelsea ngamtu City chungah Liverpool

Inrinni zan Premier League inkhel ngaihven hlawhah Manchester City chuan 2-1 in Chelsea an hneh a, table-ah pathumna dinhmun an luah ve leh ta. 

Etihad Stadium-a inkhelah Blues-in N'Golo Kante hmangin goal hmahruai khung mah se City-in Kevin de Bruyne leh Riyad Mahrez hmangin an chhanglet a, champion beiseina a la thi lo tih an pholang. Liverpool-in champion zia an chhuah chhunzawm zel a, Crystal Palace lakah point an hloh dawna a lan hnuin minute 85-naa Roberto Firmino goal hmangin 2-1 in an chak a, table chung ber an luah chhunzawm zel. 

Arsenal manager Unai Emery tan ngaih ṭha taka awmna chi a ni tawh lo - an mikhual Southampton nen 2-2 in an inhnehtawk a, Spanish manager dinhmun ṭha lo sa a ṭhat loh belh. 

Frank Lampard enkawlna hnuaiah Chelsea an insiamṭha mek a, City khelmuala an lenluh hma hian khualmuala an match hnuhnung pasarihah an chak vek - inrintawkna nen Etihad Stadium an lenglut. 

Minute 21-na lekah Kante chuan goal hmahruai a rawn khung nghal a, Mateo Kovacic siamsak a ni - hetiang hian inkhel hi tawp se chu City hi league-ah a zawnin an tlawm ang a, point 12-in Reds an thlau bawk ang. Mahse, City an zam lo - minute riat a liam hman chauh tihin KDB-a shot chuan Kurt Zouma a per avangin goalkeeper Kepa Arrizabalaga-a'n ball kal dan a chhut sual a, City-in si phurh an sut. 

Riyad Mahrez chuan a finishing tawih zet hmangin minute 37-naah a khung ve leh bawk a, Chelsea an hawihai - Raheem Sterling chuan an goal thumna a khung niin inngai mah se VAR hmanga ennawn a nih hnuah offside vanga pawm a ni lo. 

Lampard-a'n hrem vanga player a lei thei lo chungin team hmuhnawm tak a din a, Etihad Stadium-ah chak lo mah se sum tam tak senga din City team an chhaih buai pha. City hian 46.74% chiah ball an chang a, Pep Guardiola-a'n top flight match 381-a Barcelona, Bayern Munich leh City-a kaihhruai tawha ball an chan tlem ber ṭum a ni. 

City boss Pep chuan, "Chelsea hi team ṭha tak an ni tih kan hre sa a, mahse kan hneh a ni. Game level sang tak a ni a, kan tlarhnung an khel ṭha hle. A harsat lai berin counter attack kan hmang ṭangkai a, goal kan khung. Goal tam zawk khung thei kan ni," a ti. 

Chelsea boss Frank Lampard chuan, "City hi kan tan chuan inzirna ṭha tak an ni a, anmahni ang nihve tumin bul kan la ṭan chauh a ni. Ka squad neih hi en ula, season hmasa lawka Championship khel an la awm nual a ni," tiin City chu an aia an ṭhat zawk thu a pawm. 

Premier League match 13-ah Liverpool-in ngamtu an la tawng lo zel a, champion nomawi an mitthla ṭan. Sadio Mane chuan Reds tan goal hmahruai a khung a, Palace-in minute 82-naa Wilfried Zaha goal hmangin an chhanglet. 

Zaha goal khung hun ngaihtuahin team pahnih hi inhnehtawk mai tura ngaih an ni a, mahse champion rilru pu Reds an beidawng lo - minute thum hnuah Roberto Firmino chuan a rawn khung ve leh a, 2-1 in an chak. 

Palace tan hian defender James Tomkins chuan goal hmahruai a khung niin inngai mah se VAR hmanga ennawn a ni a, goal luh hmaa Jordan Ayew-a'n Dejan Lovren-a lo nam thluk avangin pawm a ni lo. Liverpool manager Jurgen Klopp chuan, "A tawpah chuan hnehna changtu kan ni a, kan phu bawkin ka hria. Tihsual kan nei tlem a, an goal khung erawh a ṭha takzet. Game zawng zawngah ṭha takin a khelh theih loh tih ka hria a, kan result-ah ka lawm a ni," a ti. 

Premier League-a an ropuina neihlet beiseia Arsene Wenger nena inṭhen Arsenal an hniam tual tual a, Saints an inhnehtawkpui leh tak avangin table-ah pasarihna dinhmun an luah mek! Unai Emery naute hian hmahruaitu Liverpool chu point 19 zetin an thlau tawh a, top four spot chu point riatin an phak lo mek - heti zat tho hian relegation zone aṭangin an him. 

Gunners tan hian Alexandre Lacazette chuan goal hnih a khung a, a goal hnihna hi injury time-a lut a ni - hei hian Arsenal dinhmun a hrilhfiah a, minute 18-a an goal hmasa zawk a khung pawh si phurh sutna tho a ni! Saints tan hian Danny Ings chuan minute riatna lekah goal hmahruai a khung a, James Ward-Prowse chuan second half-ah a khung ve bawk.  Arsenal manager Unai Emery chuan, "Fan-te hi 100% in ka hrethiam. An duh danin kan khel miau lo a, a tihdamna ka zawn a ngai a ni," a ti. 

Leicester City leh Jamie Vardy te ngaihthah an thiang lo - an mikhualna ramah Brighton & Hove Albion chu 2-0 in an hneh leh ta a, point 29 neiin Liverpool hnaih bertu an ni. Foxes tan Ayoze Perez chuan minute 64-na lekah goal hmahruai a khung a, Vardy chuan penalty hmangin minute 82-naah a chhunzawm zui. 

Vardy hian Premier League match 13-ah goal 11 a khung ta a, season hmasa nena chhiar telin Brendan Rodgers enkawlna hnuaia league match 23-ah goal 21 a khung tling ta. Foxes hian point riat chiahin hmahruaitu Liverpool an thlau a, top four team tan Rodgers-a naute hi en liam mai an harsa tawh ang. 

West Ham    2 - 3    Tottenham Hotspur

Bournemouth    1 - 2    Wolverhampton 

Arsenal    2 - 2    Southampton

Brighton & Hove    0 - 2    Leicester City

Crystal Palace    1 - 2    Liverpool

Everton    0 - 2    Norwich City

Watford    0 - 3    Burnley

Manchester City    2 - 1    Chelsea