La Liga chu Zirtawpni zan khan khelh ṭan a ni ta a, result ngaihnawm a thleng nghal. Match hmasa berah Barcelona an tlawm a, Real Madrid an chak thung. 

Aritz Aduriz goal ropui vangin Athletic Bilbao lakah 1-0 in Barcelona an tlawm a, Real erawh Celta Vigo khelmualah 3-1 in an chak. Champion tum team pahnih hian result piahlamah chanchin ngaihnawm an nei tel - Real tan Gareth Bale-a'n inkhel bul a ṭan a, assist a nei tel bawk. 

Barcelona midfielder Philippe Coutinho chuan loan-in Bayern Munich a pan a, Brazil international hian mipui zing aṭangin inkhel a en. 

Barcelona-in an thiampuipa Lionel Messi chu hliam vangin an chhawr thei lo a, mahse tlarhmaah Luis Suarez leh pound maktaduai 107 man Antoine Griezmann te an la nei tho. 

Messi awm lo mah se an squad neih dan enin Barca chu chak tura beisei a ni a, ball pawh an chang tam - a pawimawh ber goal erawh an nei thei lo. Suarez-a'n woodwork tih per mah se goal a khung hman bik lo a, minute 37-naah hliam vangin Rafinha chuan a thlak. 

Barca chuan Uruguayan striker hian a chawnah hliam a neih thu an sawi a, a chawlh chhung tur an sawi lo thung - Suarez thlaktu Rafinha-a'n woodwork a tih per ve bawk. 

Hei le Aduriz 

Team pahnihin goal an khung dawn lo niin a lang tawh - mahse minute 88-naa luhtir Aduriz chuan minute 89-naah scissor-kick hmangin mawi zetin a rawn khung. 

Bilbao-a Aduriz lo enkawl tawh ṭhintu Barca coach Ernesto Valverde chuan, "Ball pet tura a inring lai ka hmuh khan thil thleng tur chu ka hrethiam. Khatiang area-ah ball i vawrh lut a, Aduriz a awm a nih chuan a hlauhawm ṭhin," tiin Aduriz a fak.  

Kum 38 mi Aduriz chuan, "A chang chuan football hi mawi ka ti ṭhin. Beiseina neih loh lai tak te hian ka ke bulah tak ball a lo thleng a, a goal leh mai ṭhin," a ti. Spanish Super Cup 2015-a Bilbao-in 4-0 a Barca an sawp ṭuma hattrick siamtu Aduriz hian season tawpah inkhelh a chawlhsan dawn a, Messi nen La Liga-a season 15 chhung a zawna goal khung thei awmchhun an ni. 

Barca fan-ten an result hriat duh miah loh an hria a, Coutinho chhuah thu an hre tel nghal bawk - Zirtawpni zan kha an tan hriatreng tlak a ni lo. 

Catalan club hian Coutinho hi Neymar-a manah kal tel tir an tum a, mahse Brazilian midfielder hian a ṭhianpa mana beh tel a duh lo. Bayern Munich an lo lang vat a, German champion tan season khat chhung loan-in a khel dawn ta. Bayern chief executive Karl-Heinz Rummenigge chuan, "Hming langsar a nih vang a ni lo a, a quality avangin kan lalut," a ti. 

January 2018-a pound maktaduai 142-a Barca pantu Coutinho hian Spanish champion tan match 76-a khelhah goal 21 a khungsak hman. 

Gareth Bale-a'n nipui transfer-ah Real chhuahsan ṭep mah se rin loh takin inkhel bul a ṭan a, shot ṭha zet a neih hnuah Karim Benzema tan minute 12-naah goal khung tur ṭha takin a siamsak. 

Real midfielder Luka Modric chu minute 56-naah hnawhchhuah ni mah se Zinedine Zidane enkawl team an buai phah lo a, Toni Kroos leh Lucas Vazquez-ten goal khat ve ve an khung zui. Celta tan substitute Iker Losada chuan hun pek belhah goal khat a rawn khung ve a, mualpho lutuk tur khuhna goal chauh a ni tawh. 

Eden Hazard chuan inkhel bul a ṭan ngei rin ni mah se training-naah a malpuiah hliam a nei a, Real fan-ten an player thar inlan hun tur an nghah phawt a la ngai. 

Real coach Zidane chuan inkhelh zawhah Bale chungchang sawiin, "Kan hnenah a cham dawn a, thil lawmawm tak a ni tih kan pawm tlang tur a ni," a ti. 

Zidane chuan Hazard inhliam vanga Bale chhawr a nih loh thu sawiin, "Eden Hazard inhliam hi pawi ka ti a, mahse Bale laka ka thutlukna thlaktu erawh a ni lo. "Bale mai niloin a ṭhiante hian Real jersey hak hlutzia hi an pholang zel dawn a ni," a ti a, Welsh forward hi Paris Saint-Germain nen pawh sawi zawm ni mah se a chhuak dawn ta lo niin a lang. 

Hetihlai hian Real leh Barca elpui ber tura ngaih Atletico Madrid chu nizan khan an inlan a, he thu buatsaih lai hian result kan hre hman lo.