Arsenal an chak zawn ve ta

Pierre Emerick-Aubameyang leh Alexandre Lacazette ten Arsenal chu Burnley lakah 2-1 in hnehna an chanpui a, inkhelh bana fans lamin an sawi zui ber erawh Emirates Stadium-a midfielder Dani Ceballos chetla vel chu a ni.

Inrinni zan Premier League inkhelah Lacazette-a'n buai nuaih karah goalkeeper Nick Pope kap karah a khung, mikhual striker Ashley Barnes-a'n chawlhlawk hma chiahin an siphurh sut mah se Gunners lamin Auba hmangin chakna goal an khung, match hnihah vawi hnih an chak.

Arsenal tan Dani Ceballos-a'n a vawi khat nan inkhel bul a ṭan a, Real Madrid aṭanga loan hmanga an hawh midfielder hi inkhel khaikhawmtu pawimawh a ni, ball a thiam zia a lantir bakah a thawkrim - an goal pahnih luh nana tha thawhtu a ni.

David Luiz pawh minute 90 chhung a inlan a, Chelsea defender hlui hian hmun pawimawh chan chhunzawm phu khawpin a khel ṭha.  Rawlthar Reiss Nelson leh Joe Willock ten hmun chang lehin, winger thar Nicolas Pepe pawh bench aṭangin a inlan.

Pound maktaduai 72 man Pepe-a'n player cherang leh tlanchak a nihna lantir mah se goal erawh a la sual chhuak lo. Ivory Coast international hi an match lehpeka Liverpool nen an inkhelh hunah chuan minute 90 a inlan theih a rinawm tawh.

Kum 2009 hnu lamah Arsenal hian Premier League season tir lama an match hmasa pahniha an chak zawn lehna hmasa ber an tawng a, season hmasa phei kha chuan Manchester City leh Chelsea ngam lo nghal chungin bul an ṭan.

Gunners manager Emery chuan, "Kan duh leh tum ang tak chuan inkhel kan thunun lo. Match tinah hian zir belh tur kan nei zel, tun aia ṭha zawk hian kan la khel chhuak thei a ni," a ti. Spanish manager hian a player tharte chet danah a lawm thu a sawi bawk.

London club tan Newcastle leh Burnley hneh hi chanchin ṭha a ni a, chutih rualin insawitheihna tur a la ni lo. Liverpool an lenchilh tur leh Tottenham an mikhual tur hi tun season chhunga fiahna hmasa a ni ang.