VAR puihnain Spurs-in City an chelh

Injury time-a Gabriel Jesus goal thun hmangin Manchester City chu chak tawhah an inngai a, mahse VAR hmangin an goal hi hnawlsak an ni. Inrinni zan khan Man City leh Tottenham Hotspur-te 2-2 in an inhnehtawk a, Premier League champion laiin point hnih hlu tak an hloh.

Pep Guardiola-a'n West Ham an sawp ṭuma bul ṭantute aṭangin tlarhnungah John Stones aiah Nicolas Otamendi a rawn dahlut. Midfield-ah captain David Silva aiah Ilkay Gundogan luhtirin tlar hmaah Raheem Sterling a rawn inlan nawn a, Gabriel Jesus leh Riyad Mahrez aiah Sergio Aguero leh Bernardo Silva ten bul an ṭan thung.

Player pali thlak chungin Man City khel hi ṭum dang ang thoin a hnum ṭha a, an hmaah champion rinkai zinga telpha Tottenham an ding tih reng a hriat loh. Spurs striker chhuanvawr Harry Kane chuan hun rei tak Man City area lamah ball a chang lo a, Pep Guardiola-a'n mimal taka a fak Kevin De Bruyne erawh football hrethiam ve ik chuan player ṭha bik a nihzia an hmuh hmaih lo ang.

Spurs-in an player manto ber Tanguy Ndombele leh class sang Christian Eriksen te nen bul an ṭan chungin Man City ball inpe kual an thlir a, team pahnih an inthlau.

City midfielder De Bruyne-a cross ṭha zet chu Raheem Sterling-a'n a tauh lut a, minute 20-na chauh a nih avangin goal tam zawk a luh theih a rinawm. Amaherawhchu, Man City tlarhnung inthlahdah zeuh karah Spurs midfielder Erik Lamela chuan minute 23-naah box pawn aṭangin goal kilah tak a dah a, position dik lo Ederson-a'n a ban pha lo!

Inkhel thununtu Man City bawkin minute 35-naah an khung a, De Bruyne-a cross ṭha zet chu Sergio Aguero-a'n a class pholan nan a hmang. Pep Guardiola hote tan point thum chiang tura ngaih theih ni mah se Spurs substitute Lucas Moura-a'n minute 56-naah siphurh sutna goal a tauh lut a, 2-2 in inkhel a tawp.

April thla khan VAR-in Man City ṭantute a vel tawh a, Champions League quarterfinal-a an khingpui hi tun ṭuma an hmachhawn Tottenham tho an ni. Khami ṭum khan injury time-ah Sterling-a'n chakna goal a khungah an ngai a, Man City ṭantute lawm hman mah se VAR hmangin pawmsak an ni lo - Pep Guardiola hote Champions League aṭangin an tla.

Man City hi VAR mangchhia hian a la kalsan lo. Aguero thlaktu Gabriel Jesus chuan mawi zetin a khung a, Etihad Stadium lawmna chu VAR vang bawkin a reh nghal vat. Brazilian forward Jesus-a'n ball a chan hma hian Aymeric Laporte kut a fuh hmasa a, football dan tharah ball-in kut a per chuan tihpalh pawh ni se foul a nih vek tawh avangin Man City goal hi pawm a ni lo.

Pep Guardiola chuan, "Hun tawp hmaa goal kan khung avangin pawm thiam a har, thil thlen dan in hriat chian duh chuan keimah ni loin VAR buaipuitute kha zawt ru. Keini chuan pawm mai loh chu tih theih kan nei lo," tiin a lungawi loh thu a sawi.

Tun ṭum hi Man City-in nikum December 22-a Crystal Palace an hneh loh hnua an muala point an hlohna hmasa ber a ni a, referee-in hun tawp hamrik a ham chiah hian City ṭantuten an lungawi lohna lantir nan an 'boo' nasa hle.