Liverpool an chak hram

Premier League champion beisei Liverpool chuan 2-1 in Southampton an hneh a, an match hmasa pahnihah hnehna an chang - an tlarhnung pawp avangin lawm erawh a kim lo ang. 

Liverpool tan Sadio Mane leh Roberto Firmino ten goal khat ve ve an khung a, Saints tan  substitute Danny Ings chuan a club hlui lakah goal khat a khung ve bawk. Reds tan goal venghim tur Adrian chu an lama goal luh chhan a ni a, hliam vanga inlan lo tura sawi goalkeeper hian ball petchhuah a tumna lamah Ings a pet per a, a per let hi a goal!

Liverpool-in an match hmasa berah hliam vangin Alisson an chan a, Brazilian goalkeeper tel lo chuan Liverpool tlarhnung a nghing tih loh rual a ni lo. 

Anfield-ah Norwich lakah goal an chhuah a, Super Cup-ah Chelsea-in goal hnih an khung a, Southampton tlarhma hriam ngat se chak lo thei an ni bawk. Reds game hi tlarhnung aṭanga in 'din' a ni a, Alisson aṭanga bul ṭanin tlarhnungah ball an inpe tam a, chuta ṭang chuan an nawr ṭhin - Alisson thlaktu Adrian hian a la thiam ve tawk lo niin a lang. 

Liverpool-in Adrian vangin UEFA Super Cup nomawi an chawi a, Adrian vang vekin an duh ber Premier League inelnaa an league match hnihna lekah an tlawm teuh hle. 

Spanish keeper-in a tihsual vangin goal an chhuah a, Ings kha goal hmaah hriam ngat se si phurh sutna khung thei an ni bawk - Liverpool an vannei. Mahse, Klopp chuan a keeper hi chhanin, "Adrian hi 100% fit lo chunga inkhel a ni a, ball kan pe let hnem mah mah a ni," a ti a, Adrian hian Maya Yoshida ball tauh chu hnai set sawt aṭangin a dan sak tih hriat tel a ṭha. 

April 2018 hnua a vawi khat nan Alex Oxlade-Chamberlain chuan Premier League-ah inkhel bul a ṭan a, a nuam tih berna midfield-ah dah a nih avangin Chelsea laka forward-a hman Ox hi a khel ṭha hle. 

Mane leh Firmino te goal khung a 'class' a sang a, Brazilian forward Firmino hian Mohamed Salah nen hnai tak aṭangin hlah mah se Klopp atan anni pathum inkawp hi an pawimawh leh dawn tih a lang. Liverpool hian August 24 zanah anmahni ang thoa vawi hnih chak tawh Arsenal an hmachhawn dawn a, league-ah match 11 chhung a zawnin chak tawh mah se tlarhnung an insiamṭhat vat loh chuan Gunners hi chetsual theihna an ni ang.