Number 1 Djokovic a tlawm

Inrinni zan khan Novak Djokovic chu Cincinnati Masters semifinal aṭanga vuak tlak a ni. Serbian tlangval hi Daniil Medvedev lakah 3-6, 6-3, 6-3 in a chak lo.

Centre Court-a inkhelah Grand Slam vawi 16 champion tawh Djokovic a hriam tawk lo a, chutihrualin a khingpui seeded pakuana Medvedev chu chak phu khawpin a khel chhuak bawk. 

Inkhel dangah David Goffin chuan Richard Gasquet 6-3, 6-4 a hnehin final a lut ve bawk, nizan zanlaiah khan nomawi inchuhna neih zui a ni a, result kan hre hman lo.

World number 1 Djokovic chuan, "Medvedev hi khawvela player ṭha berte zinga mi a ni," a ti. Medvedev hian tun hnaiah nomawi chawi chiah lo mah se Citi Open leh Rogers Cup-ah te final a khel phak.

Cincinnati Masters-ah hian Roger Federer pawh a inlan, Swiss star hi last 16 paltlang zo loin a tla. World number 2 Rafael Nadal erawh a inlan lo. Player langsar pathum Federer, Nadal leh Djokovic te hi August 26 aṭanga khelh tur US Open-ah champion tura rinkai an ni leh ang.