Remsanga'n Dhyan Chand award dawng dawn

Thal kah thiam C. Lalremsanga chu Dhyan Chand Award for Lifetime Achievement in Sports and Games dawng tura thlan a ni.

Mizo pa Remsanga chuan, "Tun hma khan Arjuna Award dawnte kha kan beisei ve ṭhin a, amaherawhchu induhsakna vangin mimal chawimawina hi chu kan chan turah ka ruat lo. Tun ṭuma Dhyan Chand award ka dawng tur hi ka lawm hle a ni," tiin Vanglaini a hrilh.

Remsanga hi December 12, 1973 khan East Lungdar-ah C. Lalruaia leh C. Dengmawii nupa inkarah a piang a. Kum 1992 Barcelona Olympic leh 1996 a Atlanta Olympic-ah khan India aiawhin a feh chhuak a, India hmarchhak aṭanga double Olympian hmasa ber a ni.

Dhyan Chand Award chungchanga Vanglaini zawhna chhangin Remsanga chuan, "Kan lo zirtir chhuah ve tawhten award dawng thei tur zingah min ngai a, Dhyan Chand Award dil ve turin min ngen a. A tirah han pha deuh mah ila an ngenna zah sakin pen tui leh lehkha phek bak chân tur a awm chuang lo tiin dilna ka thehlut a, tun hi kan thleng ta a ni," tiin a sawi.

Dhyan Chand Award hi infiamnaa sulhnu nei ṭha leh a hnu lam zela an telna discipline tana thawh hlawk hnena pek a ni ṭhin. Infiammi chawimawina hi dawng pha tur chuan inelna lian tham Olympic Games, Paralympic Games, Asian Games, Commonwealth Games, World Championship leh World Cup zinga eng emaw berah an tel phak a ngai a, kum 2002 aṭang khan pek ṭan a ni.

Chawimawina hian a tirah chuan pawisa nuai thum a keng tel ṭhin a, kum 2016 aṭang khan nuai ngaah tih san niin pawisa bakah hian hamṭhatna ṭhahnem tak a keng tel bawk. India hian hockey player ropui Dhyan Chand pian cham August 29-ah National Sports Day a hmang ṭhin a, he hunah hian award hi an pe ṭhin.