Aizawl khawpui tâwt tihziaawmna leh Mizoramin khawpui changkang zawk a neih theih nan Thenzawl rama sq.km. 108-a zauah Thenzawl Peace City din tum a ni a, khawpui chhung bik (urban area) chu sq.km 82 ni tura ruahman a ni. Peace City Master Plan siam nan sorkar laipuiin cheng vbc. 10 (nuai 1,000) a pe dawn a, cheng nuai 100 a rawn pe tawh.
Chief minister Lalduhoma kaihhruaiin nimin khan a pisaah sorkar hotute'n Thenzawl Peace City dinna tur ruangám (master plan) siam chungchang an sawiho. Thenzawlah mi 10,000 vel an cheng meka ngaih a ni a; ruahman dan chuan Thenzawl ram sq.km. 108 huam chhung velah plan siamin, urban area bik chu sq.km 82 ang vel tura chhût ni se, an ti.
Master Plan atan hian Ministry of Housing & Urban Affairs chuan Mizoram sorkar hnenah cheng vbc. 10 a phalsak a, bul ṭanna tur cheng nuai 100 a rawn pek tawh thu ṭhutkhawmah tarlan a ni. Plan siamtu tur agency thlan hunah 25% an rawn pe leh dawn a, DPR draft thehluh hunah 35% rawn pe lehin, final DPR hunah 30% an rawn pe chhuak leh dawn nia tarlan a ni bawk.
Chief Minister chuan, Thenzawlah tuihna ṭha tak tak a awm thu a sawi a, "Fûrah chuan chenna inte a chîm hial ṭhin. Kan master plan-ah hian khaw lailia lui mawi tak, dil nalh tak leh a chhehvel ram mawi tak a awm ngei tur a ni a, sorkar hmunhma, nakin zela kan la chhawr ṭangkai tur kan ruahman a ngai bawk. Tlang rama plan city, mawi leh khualzin hîp tak, chenna atana duhawm si ruahman ngei kan tum dawn nia," a ti.
Ṭhutkhawmah hian UDPA minister K Sap-danga leh chief secretary Khilli Ram Meena bakah, sorkar mi pawimawh dangte an tel.
THENZAWL PEACE CITY RUAHMANNA
* Ram sq.km 108 huam chhungah plan siamin, urban area bik chu sq.km 82 vel tura chhût a ni.
* Mipui bit zawng hectare khatah mi 100 a nih chuan mi 10,00,000 vel thâwl nuam takin an khawsa thei tur a ngaih a ni a, a ṭul anga tihlen zel theih a ni ang.
* Master plan siam turin agency rintlak leh hmingṭha thlan tum a ni a, sorkar aṭanga Peace City buaipuitu tur bik Special Purpose Vehicle din a dawn.
* Master plan atan Ministry of Housing & Urban Affairs-in cheng vbc 10 hman a phalsak a; bul ṭanna tur cheng nuai 100 a pe tawh.
