Bána Kaih Innovation Challenge-a bul ṭanna tur sum CM-in a sem

Chief minister Lalduhoma chuan nimin khan CM conference hall-ah state level Chief Minister's Bána Kaih Inventor's Challenge lawmman dawngtute hnenah bul an ṭanna tur pawisa (seed money) a hlan.

CM Lalduhoma chuan, pi leh pute hun aṭang tawhin hmanrua tam tak an lo hmuh chhuah tawh thu sawiin, "Heráwt te, hmuí te, puantahna te leh thil dang dang an hmu chhuak a, an technology pawh kha a lo sang viau mai. Ṭhangtharte hian anni aia ṭha leh changkang zawk kan la siam hlei thei lo zawk hian a lang. Darkhuang thar te, dâr tharte hi kan siam leh tawh chuang lo rêng rêng a, ṭhangthar fing zawka ngaihte hian ṭan kan lak a ṭul," a ti.

Inventor ni turin lehkhathiam nih a ṭangkai rualin, lehkhathiam lem lo inventor ropui tak tak khawvelah mi tam tak an awm thu sawiin Lalduhoma chuan, "Miin hmanraw ṭangkai leh mihringte tana ṭangkai siam a duhna, mi dangte ṭanpuitu nih duhna, awlsamna min thlen thei thil thar hmuh chhuah duhna zawkin inventor-ah min siam ṭhin," a ti a; chutiang rilru pu chu tam deuh deuh se an duh thu a sawi.

Chief Minister chuan, Mizoramah innovator leh inventor tam tak an awm an ring tih sawiin, "Chu'ng mite dap chhuak a, patent thlenga tihpui hi he challenge-in a tum a ni," a ti a; thil hmu chhuaktu leh siam chhuaktute chu kal zel tura chahin, "Challenge a nih ang ngeiin mi dangte pawhin he kawng hi rawn zawh ve zel se kan duh a ni," a ti.

Bul ṭanna tur sum hlanna inkhawm hi Planning commissioner Vanlaldina Fanai-in a kaihruai a; intihsiakna buatsaih leh lawmman semah duhtawk mai lo tura chahin, "Kan ûm zui zel a, hmasawnna min thlenpuitu nihtir ngei kan tum a ngai," a ti. Seed money an dawn chu an hmalakna tihhmasawn zelna leh bul an ṭan thar nan an hman ngei a beisei thu a sawi bawk.

Bána Kaih Innovation Challenge-ah hian March 2025 khan lawmman dawngtute puan a ni tawh a, lawmman pawh hlan a ni.