Central Health Joint Secretary hoin Mizorama hnathawh dan enho a ni

Sorkar laipuia Ministry of Health & Family Welfare joint secretary Vijay Nehra hoin June 3, Thawhlehni khan sorkar laipuia health programme hrang hrangte hmalak dan thlir let a ni a; Mizoram Health secretary H Lalengmawia'n a kaihruai.

Review meeting-ah hian Mizoram HFW department leh NHM hotute an tel a; NPNCD state nodal officer Dr Catherine Lalmuanawmi leh NMHP leh NPPCD state nodal officer Dr Robert L Khawlhring ten Health department hmalakna hrang hrangte an sawifiah.

Vijay Nehra chuan, Mizoramin national health programme hrang hrangah a thawk ṭhaa a hriat thu leh cancer enkawlna/radiotherapy a kalpui dan chu ṭha a tih thu sawiin, dialysis tih theihna hmun a neih theih nan hma la zel tura a duh thu a sawi a; Mental Health Programme hnuaia Tele MANAS chu mipuite'n ṭangkai zawka an hman theih nan ṭan la turin a chah.

H Lalengmawia chuan, MoHFW duhsakna leh puihna Mizoramin a dawn zawng zawngah an lawm thu a sawi rualin, Mizoram sorkarin tih tur leh bawhzui tur tam tak a neih thu a sawi.

MoHFW Joint Secretary hian Civil Hospital, Aizawl tlawhin, Dialysis Ward, Cardiology Ward leh operation theatre-te a fang kual a; thawktute chu mipui tana taima leh ṭhahnemngai taka thawk zel turin a chah.