Serchhip Sub-Hqrs YMA hruaitute'n chhiatna thlenna hmunte an tlawh

YMA Sub-Headquarters, Serchhip hruaitute chuan June 3, Thawhlehni khan tun hnaia ruahsûr nasa vanga Serchhipa chhiatna thlenna hmunte an tlawh a; vanduaina tâwk zawng zawng an tawrhpui thu leh chhawmdawlna hna thawktute chungah an lawm thu an sawi.

Serchhip Sub-Hqrs. YMA hruaitute hian tun hnaia ruahsur nasa kaihhawiha Serchhip P&E Venga in chhia senghawi hnatlangte an tlawh a, hnatlangah hian Serchhip P&E Veng khawtlang bakah Serchhip Kawnpui North Branch YMA leh Chhêkhnai Branch YMA aṭangin mi 150 vel an thawk chhuak. Serchhip Sub-Hqrs. YMA hruaitute hian hnatlangte pawisa an pe a ni.

Serchhip By-pass Road-a leimin vanga lirthei tangkhang mekte pawh a hmunah tlawhin Serchhip YMA hruaitute chuan kawngpui enkawltuten leimin thenfai hna an thawh mek chu a hmunah an enfiah nghal.

Serchhip Sub-Hqrs, YMA chuan, leimin vanga mi tam takin harsatna tawka khualzin leh bungraw phur lirthei tam takte an tangkhan laia Serchhip Kawnpui South Branch YMA, New Serchhip North Branch YMA leh Serchhip Darnam Branch YMA bakah, Serchhip khawpui páwn lama YMA branch ṭhenkhatte'n chaw leh riahna turte an lo buatsaihsak chu lawmawm an tih thu an sawi bawk.