Phuldungseia Thaidawr tlangah Mizoram IR police dah a ni dawn

MZP General Head­quarters hruaitute chu June 3, Thawhlehni khan Home minister K Sapdanga'n a sawm angin a pisaah an lêng a; Home Minister chuan, Phuldungsei Thaidawr tlangah Mizoram sorkarin IR police a dah dawn thu a lo hrilh niin an tarlang.

Inkawmnaah hian Phuldungsei Thaidawr tlang pan chhohna kawng sira Tripura sorkarin guest house tur an sak chungchang leh Tripura sorkar hmalak dan sawiho a ni a; MZP hruaitute chuan, Tripura sorkarin cheng nuai 300 sengin guest house an sak mek thu leh Tripura State Rifles mi leh sate an duty reng thu sawiin, Mizoram state police-te pawh duty ve nghal se an duh thu Home Minister hnenah an thlen a ni.

MZP hruaitute chuan, Tripura sorkarin guest house a sak mek chu tun hnaiah bomb hmanga tihchhiat a nih hnuah pawh sak chhunzawm an tum lehnghal tih sawiin, an sak chhunzawm tawh loh nan theihtawpa dodal turin Home Minister an ngen bawk.

Home minister K Sapdanga chuan, Kawnpui M aṭangin Thaidawr tlang pan chhohnaah Mizoram IR police-te dah a nih dawn thu sawiin, hmalak mek a nih thu MZP hruaitute a hrilh a; Tripura Tourism Minister nen an inbiak thu sawiin, guest house tur chu sa chhunzawm tawh lo tura a hrilh thu leh official level-ah sawiho tura an ruahman thu a sawi bawk.

K Sapdanga chuan, Tripura State Rifles-in Thaidawr tlang pan chhohna turah check gate an siam chu ṭhiat nghal tura an hrilh thu a sawi a; MZP hruaitute chuan, Phuldungsei khawtlang hruaitute hnen aṭanga thu a dawn danin, check gate chu ṭhiah a nih tawh thu an tarlang.

MZP hruaitute chuan, Home Minister hmalaknaah lawm thu an hrilh a, Jampui tlangdunga Mizo mipui leh Mizoram khua leh tuite veng him tura theihtawp chhuah zel tura ngen nghalin, ram leh hnam tana sorkar hmalaknate an theih ang anga an thlâwp zel tur thu an sawi a ni.