KHAWTHLIR

NAAC team kâwm

Mizoram University endik mektu National Assessment and Accreditation Council (NAAC) Peer Team chu May 3, Thawhlehni khan MZU Alumni member-te nen MZU Guest House Conference Hall-ah an inkâwm. NAAC team hi MZU Alumni Association president Dr Henry Zodinliana leh coordinator Prof. K Robin bakah, Alumni member-te’n an lo dawngsawng a; MZU aṭanga zir chhuak minister pahnih - Dr Vanlalthlana leh B Lalchhanzova te pawh an tel. Inkawmhonaah MZUAA kalpui dan, MZU-a zir chhuakte'n khawtlang leh ram tana thâ an thawh dante sawiho a ni.

CM leh STA

Chief minister Lalduhoma chuan nimin khan a pisaah Mizoram State Transport Authority member-te a kâwm. STA ruahmanna hrang hrang - city bus sei zawng bithliahna muangmara hman tura duan te, city bus tlan dan mumal leh hunbi dik zawk a awm theihna tur te, lirthei permit dam rei zawng bithliahna te, khawchhak chhuak Kenbo bike khuahkhirhna tur te, Aizawla online cab booking system kalpui chungchang leh hmachhawp dangte sawiho a ni.

MLA-in tlawh kual

South Tuipui bialtu MLA Jeje Lalpekhlua, ZPM Ṭhalai president ni bawk chuan nimin khan a bial, Hnahthial khaw chhunga leimin leh chhiatna thleng mai theia ngaih hmunte a tlawh a, silpauline eng emaw zat a sem. Jeje Lalpekhua chuan, leiminin a tihbuai chhungkuate a tawrhpui thu a sawi a, "Ka theih chin chinah hmalak chhunzawm zel ka tum a ni," a ti.

Chhiatna sawiho

Lunglei DC Navneet Mann hoin June 3, Thawhlehni khan a pisaah tun hnaia ruahsur nasa vanga Lunglei district hmun hrang hranga chhiatna leh harsatna thlenga hmalak dan tur sawiho a ni. Bawrhsap chuan, chhiatna thlengin a nghawng leh a tuartute chhawmdawlna lam ngai pawimawh a, hma la zung zung turin zonal officer-te a chah.