Ni 12 chhungin leimin 675 a awm; Darkar 24 chhungin leimin 49 awm belh

Disaster Management & Rehabilitation (DMR) department hnuaia State Emergency Operation Centre (SEOC) chuan district 11 aṭangin June 3, Thawhlehni tlai dar 4 leh nimin tlai dar 4 inkarah leimin report 49 a dawn belh. Tun hnai ruahsur nasa vanga leimin 675 a awm a, leimin vangin chenna in chim/chhia 269 a awm.

SEOC-in nimin tlai dar 4 thlenga report a dawn chinah, tun hnai ruahsur nasa vangin Mizoramah leimin 675 a awm a, leimin vangin chenna in 269 a chim/chhiat tawh bakah, kawng ping 310 a awm. Champhai district-ah leimin tam berin, 210 a awm a, Serchhip district (137)-in a dawt.

Leimin vangin in 269 a chhia/chim tawh a; Serchhip district-ah in 99, Champhai district-ah 38, Siaha district-ah 29, Lunglei district-ah 24, Kolasib district-ah 23, Aizawl district-ah 18, Khawzawl district-ah 10, Saitual district-ah pariat, Lawngtlai leh Hnahthial district-ah pasarih ve ve leh, Mamit district-ah paruk a chim/chhia a ni.

SEOC hian leimin vanga kawng ping 310 a chhinchhiah tawh a, chu'ng zinga 163 chu Serchhip district-a mi a ni. Khawzawl district-ah 36, Lunglei district-ah 29, Siaha district-ah 19, Aizawl district-ah 17, Hnahthial district-ah 14, Champhai district-ah 13, Lawngtlai leh Mamit district-ah paruk ve ve, Saitual district-ah pali leh Kolasib disrtict-ah pathum a awm. Kawng pingte hi a tam ber chu lirthei tlân theiha tihtlang a ni tawh.

Khurel chhiatna vang hian Mizoram hmun hrang hrangah lungrem (retaining wall) chim 60 report a awm a; lung tlakna hmun pasarih, thing tlûkna hmun pariat, electric ban tlu 10, lei tlahniam pakua, thlanmual chim pathum, mitthi panga leh sabereka khuangkaih pathum a awm bawk.