Home Minister hian nimin khan cable TV-ah thuchah sawiin, mipuiin Covid-19 laka invênna atana sorkar thupekte an zawm ṭhat thu a sawi a, "Mi tlemtê self isolation/quarantine-a awm tura tihte zingah luhlul tlat an awm hi a pawi. Sorkarin ruahmanna a siamte i zâwm hram ang u. I tan, in chhungte tan, kan zavaia tan a ni," a ti.
Tun hunah nunna chhanhim aia pawimawh tih tur a awm lo tih sawiin Lalchamliana chuan, "Mi thiamte'n Covid-19 laka invenna an sawite hi i zawm ang u. Curfew puan hi a hrehawm, nunphung a tikhaihlak. Thupek siamtu nih hi tu pawhin nuam an ti lo ang, loh theih loh vangin an siam a ni," a ti a; páwna chhuah loh chu uar leh zuala zâwm turin mipui a sawm. Home Minister chuan, hun khirh tak thleng mek chu lungrual taka mithiamte kaihhruainaa do a nih chuan Mizoramin a hneh ngei a rin thu sawiin, "Harsa lutuk loin kan paltlang theih ngei ka beisei tlat. Kan mithiamte'n min ngenna leh sorkar thupek hi taima taka kan zawm phawt chuan he hun khirh tak hi kan paltlang thei ang tih ka ring tlat a ni," a ti.
Mipuite'n thu an awih chu lawm awm a tih thu sawiin Lalcham liana chuan, "He hri laka invenna atana mipui inpekna a fakawm. Nunphung a tibuai dawn tih hre reng chungin mipuite'n pawn chhuah khap an nghakhlel hle tih a tilang. Beisei ang ngeiin páwna chhuak an tlem hi a lawmawm tak zet a ni," a ti a, mipui inpeknain beiseina a pek thu a sawi. Home Minister chuan, social media-ah thu dik lo thehdarh lo tura mipui chahin, "Tu mah ti tawh lo turin ka ngen a ni. April fool lo thleng tur hi remchangah hmangin fiamthu an lo thawh ang tih a hlauhawm. Intihderna atan hmang lo turin kan inchah a ni," a ti.
Lalchamliana hian Covid-19 dona atana thawktu zawng zawngte leh Covid-19 vanga punkhawmna lam chi ṭhulh phah NGO, political party leh kohhran zawng zawngte hnenah lawmthu a sawi. Home Minister sawi danin, Covid-19 avangin Bangladesh leh Myanmar depah border duty post 54 siam belh a ni a, lockdown duty-na hmun 205 siam niin, chu'ng bakah chuan duty thlahthlam theih lohna hmunahte police an duty bawk.
