KHAWTHLIR

Mizorama Covid-19 vei mekin March 16, 2020-a Guwahati-Aizawl GoAir flight no. G8-298-a a chuanpui, in lama inkhung hrang mekte chungah lawmthu a sawi rualin, April 6, 2020 thleng la inkhung hrang zel tura tih an nih thu, Covid-19 spokperson Dr Pachuau Lalmalsawma chuan a puang a; "Mahni tan mai ni lo, kan chhungkua, kan ram tan a ni tih hria in, ṭha taka kalpui zel turin kan inngen e," a ti. 

 Mizoram MLA hlui J Lawmzuala (76) h/o Lalkungpuii, Lunglei Chanmari Veng chu nimin zing dar 7:30 khan Lunglei Civil Hospitalah a thi a, nimin vek khan vui a ni. J Lawmzuala hi kum 1998 khan MPC ticket-in Lunglei South bial aṭangin MLA atana thlan a ni a, KVI Board chairman atan ruat a ni. Media lamah pawh a inhmang a, kum 1991 khan JB Cable Network a din a ni. 

PPP Mode Bawlhhlawh Paih Welfare chuan March 30, 2020 aṭanga lockdown hun chhung bawlhhlawh paih rih loh an rêl chu nimina AMC hotute nen an inbiak hnuah a pangngaiin an paih chhunzawm dawn. AMC Mayor chuan Vanglaini palai zawhna chhangin, bawlhhlawh paih chhunzawm a nih tur thu a sawi a, "An gum boot tur, kutkawr tur leh mask tur nimin khan kan pe. An kawr tur pawh pek kan tum," a ti. 

Aizawl Municipal Corporation chhunga páwnchhuah khapna Aizawl District Magistrate-in a tihchhuaha curfew-in a huam loh zingah P&E department hnuaia power supply buaipuitu, damdawi (wholesale leh retail) leh Covid-19 kaihhnawih bungraw zuar, mipui mamawh tui phur, ran chaw zuar leh private security service-te telh belh an ni

Pachhunga University College principal leh thawktu dangte chuan an ni khat hlawh ṭheuh an thawh khawm a, Mizoram sorkarin Covid-19 a dona atan Health minister Dr R Lalthangliana hnenah nimin khan Rs. 6,25,760 an hlan.

Lengteng bialtu MLA L Thangmawia chuan nimin khan MLA fund aṭangin Covid-19 laka invennaa a ṭul apianga an hman turin Ngopa CHCah Rs. 20,000, Mimbung PHC-ah Rs. 15,000, NE Khawdungsei PHC-ah Rs. 15,000 leh Kawlkulh PHC-ah Rs. 15,000 a pe. Pawisa hi a vaiin Rs. 65,000 a ni a, Ngopa SDO(Civil) kaltlangin a hlan a ni.