Covid-19 do nan puanṭhuite an chê

Mizoram hmun hrang hranga puan ṭhuite chu tunlai hian Covid-19 dona atan an pên chhuak a, medical lama thawktute leh venhimna lama thawktu hâk tur leh hman turte a thlâwnin an ṭhuisak. Vanglaini thu dawn danin, Whatsapp group pakhat 'Puanthân Chhungkua' tihah mi ṭhahnemngai pakhatin an veng local task force-te'n medical facility an neih ṭhat loh thu an veng chhung group-a a post chu post chhawn a ni. Hei hi Puanthan Chhungkaw memberte chuan ngaihvenin, hmalak dan kawng an dap zui a ni.

March 25, 2020 khan Puanthan Chhungkaw member ṭhenkhat chuan Whatsapp group dang siamin, puan ṭhui ṭhin an hriatte an telh a, mi ṭhahnemngaite'n an zawm belh zel bawk. Group-ah chuan hmalak dan tur an sawiho a, puanthân leh thil dang atan sum an mamawh dawn avangin chumi atan chuan donation khawn phawt an rawt a, March 26 khan donation chu social media kaltlanga khawnin, cheng nuai khat chuang an hmu nghal.

A tira group siam bakah district hrang hranga puanṭhuite'n an district pualin group an siam ve leh a, donation aṭanga an sum hmuh chu puanthàn leh mamawh dang leina atan an insem a ni. Group hrang hrangah doctor-te telhin, doctor-te'n a ṭhui dan tur kaihhruainate an siamsak ṭhin.

Synod Hospital leh Kolasib District Hospital chuan personal protective equipment (PPE) atana puan mamawh angte puanṭhuite hnenah an pe a, anni'n a thlàwnin an ṭhuisak. Puanṭhuite'n an mamawh hmanrua an neih theihna atan DC-te chuan chhuah phalna an pe a, local task force-te nen hmanrua an dap khawm ṭhin a ni.

Puanṭhuite hian PPE, pheikhawk chunga bun chi leh hmai tuamna (mask) an ṭhui ber a, a ṭul dan azirin damdawi-in lamah an pe ṭhin. Kolasib district bik chuan protective gear (hmai tuamna chi khat) an ṭhui tel a, Vairengtea police leh medical staff duty-te hnenah an pe a ni.