Supply Minister-in FCI kudam a tlawh

Food, Civil Supplies & Consumer Affairs (FCSCA) minister K Lalrinliana chuan nimin khan Bairabi rel chawlhhmuna labour association pisa a tlawh a; Bairabi FCI kudama buhfaite Mizoram hmun hrang hranga phur turin truck neitu leh khalhtu pawlte bakah, mimalte'n an truck neih zawng zawng an thawh chhuahpui a ṭul thu a sawi.

Covid-19 avangin Bairabi FCI kudama inhlawhfa (labour) tam zawk an haw avangin rail wagon-in buhfai a phurh luhte hlān thlāk a chak theih loh thu sawiin Minister chuan, Mizorama inhlan chhawn zung zung a nih theih nan Bairabi Labour Association-te ṭhahnemngai taka a ṭul apianga thawk turin a ngen a ni. Supply Minister chuan, buhfai thiarna labour rate buhfai bag khatah Rs. 1.36-a thawk tur mamawh zat hmuh a nih loh avangin a mimal sum aṭangin bag tinah Rs. 2 zel a pek belh mek thu a sawi a; hmai tuamna leh kut silna (hand sanitizer) a pe nghal.

K Lalrinliana chuan, Bairabi FCI kudamah buhfai wagon 42 an awm mek thu leh wagon 29 thleng leh mai tur a awm thu a sawi a, "Labour-te'n wagon aṭanga truck-a an hlān zung zung loh chuan darkar sarih a pelh aṭangin darkar tin wagon pakhat zelah Rs. 150 an chawi a ngai ṭhin. Buhfai lo thleng mai turte thiar turin truck 300 vel a ngai dawn a ni," a ti. Minister hian Kolasib District Hospital medical superintendent Dr Robert Lalfakzuala hnenah personal protection equipment (PPE) 150, N95 mask 150, shoe cover 150, mask dang 400 a hlān a; Kolasib constituency-a village task force 17 hnenah Rs. 10,000 ṭheuh leh hand sanitizer a pek bakah, Bairabi damdawi-inah PPE, mask leh sanitizer a pe a ni.